“Doʻstlik–2026”: Oʻzbekiston va Hindiston harbiylari ishtirokidagi oʻquv mashgʻulotlari yakunlandi
2026-04-25 11:05:00 / Yangiliklar
Oʻquv mashgʻulotlari dasturiga muvofiq, ishtirokchilar zamonaviy jangovar vaziyatlarga moslashgan holda turli taktik epizodlarni bajarishdi. Xususan, shartli dushman guruhlarini aniqlash va yoʻq qilish, togʻ-choʻl hududlarida maxsus operatsiyalar oʻtkazish, kichik boʻlinmalar tarkibida tezkor harakatlanish hamda terrorizmga qarshi kurashish boʻyicha amaliy mashqlar oʻtkazildi. Bundan tashqari, harbiy xizmatchilar oʻrtasida jamoaviylikni mustahkamlash, muvofiqlashtirilgan harakatlarni yoʻlga qoʻyish va qaror qabul qilish tezkorligini oshirishga alohida eʻtibor qaratiladi.
Mashgʻulotlar jarayonida zamonaviy harbiy texnika va qurollardan foydalanish, aloqa vositalarini samarali qoʻllash hamda razvedka faoliyatini tashkil etish boʻyicha ham oʻzaro tajriba almashiladi. Bu esa har ikki davlat harbiy xizmatchilarining professional salohiyatini oshirish bilan birga, ularning xalqaro miqyosdagi hamkorlikka tayyorligini ham mustahkamlaydi.
Taʻkidlash kerakki, “Doʻstlik” qoʻshma oʻquv mashgʻulotlari 2019-yildan buyon muntazam ravishda oʻtkazib kelinmoqda. Shu vaqt davomida mazkur loyiha ikki davlat Qurolli Kuchlari oʻrtasidagi oʻzaro hamkorlikning muhim platformasiga aylanib ulgurdi. Har yili oʻtkazilayotgan mashgʻulotlar yangi tajribalar, innovatsion yondashuvlar va samarali uslublar bilan boyitilib, ularning koʻlami tobora kengayib bormoqda.
Hamkorlikdagi mashgʻulotlarning yopilish marosimida orttirilgan tajriba va erishilgan natijalarni yuksak baholandi va tomonlarning esdalik sovgʻalari topshirdi. Yakunda ikki davlat harbiy xizmatchilari oʻrtasida shakllangan doʻstlik, hamjihatlik va oʻzaro hurmat muhitini aks ettiruvchi ramziy chiqishlar namoyish etilib, “Doʻstlik–2026” mashgʻulotlar iliq taasurotlar ila yakunlandi.