O‘zbekiston Respublikasi Mudofaa vazirligi

Termiz harbiy garnizonining madaniyat markazida “Burch, jasorat, matonat!” shiori ostida o‘tkazilgan ochiq muloqotda “Vatanparvar” tashkiloti tomonidan yoshlarni harbiy-vatanparvarlik ruhida tarbiyalash, ular orasida sportning texnik va amaliy sport turlarini ommalashtirish hamda mehnat bozorida talab yuqori bo‘lgan kasb mutaxassislarini tayyorlash bo‘yicha amalga oshirilayotgan ishlar to‘g‘risida ma’lumot berildi.

Tashkilot o‘quv muassasalarida kasb-hunar egallash va sport bilan shug‘ullanish istagini bildirgan ishtirokchilarning murojaatlari tadbirning o‘zidayoq ijobiy hal etildi. Shuningdek, yaqinlashib kelayotgan Xotira va qadrlash kuniga urg‘u berilib, bugungi tinch, osuda hayotimizni ta’minlash uchun jasorat namunasini ko‘rsatgan, Vatan uchun jonini fido qilgan mard ota-bobolarimiz va yurtdoshlarimiz matonatini hech qachon unutmasligimiz lozimligini ta’kidladi. “O‘z navbatida, tinchlik hukm surayotgan bu aziz Vatanni asrab-avaylashimiz, uning xavfsizligi va ravnaqini ta’minlash yo‘lida tinimsiz harakatda bo‘lishimiz shart”, dedi “Vatanparvar” tashkiloti rahbari.

Tadbirning eng esda qolarli jihati – “Shunqorlar” harbiy-sport o‘yinlariga start berilishi bo‘ldi. “Shunqorlar” harbiy-sport o‘yinlari har yili mamlakatimiz bo‘ylab tuman (shahar), hududiy va respublika bosqichlarida o‘tkaziladi. Respublika bosqichida g‘olib bo‘lgan jamoa O‘zbekiston Respublikasi mudofaasiga ko‘maklashuvchi “Vatanparvar” tashkiloti Markaziy kengashi raisining kubogi bilan taqdirlanadi.

“Rahbar va yoshlar” uchrashuvi doirasida tashkil etilgan avtokross, motokross, karting, biatlon, duatlon, pnevmatik quroldan o‘q otish, aviamodel, raketamodel va kemamodel sport seksiyalarining ko‘rgazmalari tashrif buyuruvchilarda unutilmas taassurot qoldirdi.

O‘zbekiston Respublikasi mudofaasiga ko‘maklashuvchi “Vatanparvar” tashkiloti matbuot xizmati