O‘zbekiston Respublikasi Mudofaa vazirligi

Xususan, joriy yilning 19 –25-aprel kunlari Oʻzbekiston Respublikasi Harbiy xavfsizlik va mudofaa universiteti Quruqlikdagi qoʻshinlar institutida Sohibqiron Amir Temur tavalludining 690-yilligiga bagʻishlangan, Mudofaa vazirligi huzuridagi “Vatan tayanchi” harakati aʼzolari hamda xorijiy davlatlarning bitiruvchi (15–17 yoshli) oʻquvchilari oʻrtasida “Vatanparvarlar” xalqaro harbiy-sport musobaqalari tashkil etilmoqda.

Ushbu musobaqaning aynan Sohibqiron Amir Temur tavalludining 690-yilligi arafasida mamlakatimizda ilk bor oʻtkazilayotgani davlatimiz tomonidan buyuk ajdodlarimizga, milliy meros va tariximizga qaratilayotgan yuksak eʼtiborning yaqqol ifodasidir.

Mazkur tadbir orqali jamiyatda adolat, vatanparvarlik, qatʼiyat va jasorat kabi qadriyatlarni mustahkamlash, ayniqsa yosh avlod ongiga milliy gʻoya va davlatchilik ruhini singdirish koʻzda tutilgan.

Mazkur musobaqada ishtirok etish maqsadida mamlakatimizga yetib kelgan Rossiya Federatsiyasi, Belarus Respublikasi, Ozarbayjon Respublikasi, Qozogʻiston Respublikasi, Qirgʻiz Respublikasi, Tojikiston Respublikasining jamoalari milliy anʻanalarga xos tarzda kutib olindi.

Endilikda jamoalar oʻzaro bellashuvlar jarayonida oʻz mahoratlari, yuqori professionallik, intizom, jamoaviylik va qatʼiyat kabi muhim sifatlarini namoyon etadilar.

Musobaqa quyidagi shartlarni o‘z ichiga oladi:
•  turnikda tortilish; 
•  AK-74 avtomatini notoʻliq qismlarga ajratish va yigʻish; 
•  arqon tortish; 
•  merganlar bellashuvi; 
•  harbiylashtirilgan estafeta; 
•  yagona toʻsiqlar yoʻlagida umumiy nazorat mashqi (OKU); 
•  jabrlanuvchiga birinchi tibbiy yordam koʻrsatish; 
•  “Mardlar estafetasi”; 
•  “Smart sardori” ixtirochilik tanlovi; 
•  “Vatan madhi” badiiy havaskorlik tanlovi (yakkaxon va jamoaviy). 

Qoʻshimcha nominatsiyalar:
•  “Eng kuchli sportchi”; 
•  “Eng kuchli jamoa”; 
•  “Eng mohir mergan”; 
•  “Eng yaxshi ijrochi”; 
•  “Eng yaxshi ixtirochi”. 

Shuningdek, alohida natijalar va rekord koʻrsatkichlarga erishgan ishtirokchilar ham alohida nominatsiyalar boʻyicha ragʻbatlantiriladi.

Musobaqa ishtirokchilariga esdalik sovgʻalar, musobaqa ramzi tushirilgan buyumlar taqdim etiladi. Gʻolib va sovrindorlar esa kuboklar, medallar (oltin, kumush, bronza), diplomlar va qimmatbaho sovgʻalar bilan taqdirlanadi.

Eslatib oʻtamiz, bugun 20-aprel kuni soat 19:00 da ushbu xalqaro musobaqaning tantanali ochilish marosimi boʻlib oʻtadi va marosimni toʻgʻridan toʻgʻri Telegram kanali orqali tomosha qilishingiz mumkin.
Mudofaa vazirligi Axborot va ommaviy kommunikatsiyalar departamenti