MDH Mudofaa vazirlari kengashi huzuridagi Havo hujumidan mudofaa masalalari bo‘yicha Muvofiqlashtirish qo‘mitasining 62-yig‘ilishi bo‘lib o‘tdi
2026-04-16 10:50:00 / Yangiliklar
Tadbirda O‘zbekiston, Belarus, Qozog‘iston, Qirg‘iziston, Tojikiston Respublikalari va Rossiya Federatsiyasining harbiy kosmik kuchlari, havo mudofaasi va harbiy havo kuchlari, shuningdek, havo hujumidan mudofaa tizimlari qo‘mondonlari, yetakchi ekspertlar va mutaxassislar ishtirok etdi.
Yig‘ilishda zamonaviy harbiy mojarolar tahlil qilinib, tahdidlarni oldindan aniqlash va ularga qarshi samarali choralarni ishlab chiqish masalalari muhokama qilindi. Xususan, uchuvchisiz apparatlar (dronlar), yuqori aniqlikdagi qurollar, gibrid tahdidlar va kiberkomponentlarning ahamiyati alohida ta’kidlandi.
Mutaxassislar fikricha, havo va kosmik makondagi xavf-xatarlar tezkor va kompleks yondashuvni talab qiladi.
Shuningdek, yig‘ilish davomida ishtirokchi davlatlar zamonaviy urush tajribasini inobatga olgan holda havo hujumidan mudofaa tizimlarini takomillashtirish, qo‘shma harakatlarni muvofiqlashtirish va tahdidlarga tezkor hamda samarali javob berish mexanizmlarini mustahkamlash masalalarini ko‘rib chiqdi.
Kunning ikkinchi yarmida delegatsiya a’zolari poytaxtimizda joylashgan Islom sivilizatsiyasi markazi faoliyati bilan tanishdi.
Mudofaa vazirligi Axborot va ommaviy kommunikatsiyalar departamenti