O‘zbekiston Respublikasi Mudofaa vazirligi

Yig‘inning tantanali ochilish marosimi ko‘tarinki ruhda tashkil etilib, unda Toshkent harbiy okrugi qo‘mondonligi, harbiy xizmatchilar, ichki ishlar organlari vakillari, “Vatanparvar” tashkiloti, O‘zbekiston yoshlar ittifoqi, shuningdek, hududdagi davlat va jamoat tashkilotlari vakillari hamda 100 nafardan ortiq yoshlar ishtirok etdi.
Tadbir davomida so‘zga chiqqan mutasaddilar ushbu o‘quv yig‘ini yoshlar uchun keng imkoniyat va sharoitlar yaratib berishini alohida ta’kidlab, ulardan samarali va oqilona foydalanish zarurligini qayd etdi. Shuningdek, avvalgi mavsumlarda ishtirok etgan yoshlarning erishgan natijalari misol tariqasida keltirilib, yangi mavsum qatnashchilarining ham yuqori natijalarga erishishiga ishonch bildirildi.
Yig‘in dasturi doirasida harbiy saf tayyorgarligi, qurol bilan muomala qilish asoslari hamda jismoniy tayyorgarlik mashg‘ulotlari yo‘lga qo‘yilgan bo‘lib, bu jarayonlar yoshlarning nafaqat jismoniy, balki ruhiy chiniqishida ham muhim omil bo‘lib xizmat qilmoqda.
Shu bilan birga, mashg‘ulotlar faqat amaliy yo‘nalish bilan cheklanib qolmay, ma’naviy-ma’rifiy uchrashuvlar, sport musobaqalari va turli madaniy tadbirlar orqali ishtirokchilarning bo‘sh vaqtini mazmunli tashkil etishga alohida e’tibor qaratiladi. 

Toshkent harbiy okrugi matbuot xizmati