O‘zbekiston Respublikasi Mudofaa vazirligi

Mazkur nufuzli anjuman zamonaviy harbiy boshqaruv tizimlarini takomillashtirish, ilg‘or texnologiyalarni joriy etish hamda raqamlashtirish jarayonlarining dolzarb jihatlarini muhokama qilishga bag‘ishlandi. Tadbir institutning katta majlislar zalida tashkil etilib, unda mahalliy va xorijiy mutaxassislar, yetakchi olimlar hamda soha vakillari ishtirok etdi.
Konferensiya doirasida harbiy sohada innovatsion yondashuvlarni keng joriy etish, boshqaruv samaradorligini oshirish hamda zamonaviy axborot-kommunikatsiya texnologiyalaridan foydalanish masalalariga alohida e’tibor qaratildi. Shuningdek, raqamlashtirish jarayonlarining strategik ahamiyati, harbiy tizimlarda ilg‘or texnologiyalarni qo‘llash istiqbollari yuzasidan atroflicha fikr almashildi.
Ilmiy-amaliy anjumanda bir qator muhim yo‘nalishlar bo‘yicha ma’ruzalar tinglandi. Jumladan, raqamlashtirish jarayonida sun’iy intellekt va mashinali o‘qitish texnologiyalarining o‘rni, axborot va kiberxavfsizlik muammolari hamda ularning samarali yechimlari, kadrlar tayyorlashda zamonaviy raqamli texnologiyalardan foydalanish istiqbollari muhokama qilindi. Shu bilan birga, harbiy tizimlarda telekommunikatsiya, radiolokatsiya va radioelektron kurash vositalarini rivojlantirish, uchuvchisiz uchish apparatlari va ularga qarshi kurash texnologiyalarini takomillashtirish masalalari ham keng yoritildi.
Konferensiya doirasida “Robotlar jangi” musobaqasi hamda Qurolli Kuchlar tizimidagi innovatsion ishlanmalar ko‘rgazmasi tashkil etilib, ular ishtirokchilar tomonidan katta qiziqish bilan qarshi olindi.
Tadbir yakunida konferensiya ishtirokchilari hamda musobaqa g‘oliblari tantanali ravishda taqdirlandi. Anjumanda ilgari surilgan taklif va tavsiyalar kelgusida harbiy boshqaruv tizimini modernizatsiya qilish va raqamlashtirish jarayonlarini yanada jadallashtirishda muhim ahamiyat kasb etishi ta’kidlandi.

Mudofaa vazirligi Axborot va ommaviy kommunikatsiyalar departamenti