O‘zbekiston Respublikasi Mudofaa vazirligi

Mazkur nufuzli ilmiy anjuman O‘zbekiston Respublikasi Harbiy xavfsizlik va mudofaa universiteti Quruqlikdagi qo‘shinlar instituti tomonidan Xalqaro Amir Temur xayriya fondi, Temuriylar tarixi davlat muzeyi va “Ajdodlar izidan” harbiy-tarixiy jamiyat bilan hamkorlikda o‘tkazildi. 

Unda hamkor tashkilot rasmiylari, kursantlar, ofitser va serjantlar, temurshunos olimlar, yozuvchilar, nufuzli oliy ta’lim muassasalari xodimlar, hamda keng jamoatchilik vakillari va yoshlar ishtirok etdi.

Konferensiya dastlab Harbiy xavfsizlik va mudofaa universiteti Quruqlikdagi qo‘shinlar instituti hamda Xalqaro Amir Temur xayriya fondi, Temuriylar tarixi davlat muzeyi va “Ajdodlar izidan” harbiy-tarixiy jamiyati o‘rtasida hamkorlik memorandumlari imzolanishi bilan boshlandi. Shundan so‘ng Ma’naviyat va madaniyat departamentining anjumanlar zalida ilmiy sessiya o‘z ishini boshladi.

Ilmiy anjumanni Xalqaro Amir Temur xayriya fondi raisi, O‘zbekiston xalq yozuvchisi Muhammad Ali hamda O‘zbekiston Respublikasi Harbiy xavfsizlik va mudofaa universiteti Quruqlikdagi qo‘shinlar instituti rahbari ochib berdi. 

Ma’ruzachilar nutqlarida bugungi kunda mamlakatimiz fuqarolarini, ayniqsa yosh avlod va harbiy xizmatchilarni vatanparvarlik ruhida tarbiyalash, milliy g‘ururni mustahkamlash va buyuk ota-bobolardan faxrlanishda Amir Temur, Jaloliddin Manguberdi, Zaxiriddin Muhammad Bobur, To‘maris va boshqa xalq qahramonlarimizning o‘rni beqiyos ekanligi ta’kidlandi.

Xalqaro konferensiya o‘z ishida sohibqiron Amir Temurni milliy davlatchilik va jahon tarixidagi o‘rni, shuningdek, harbiy san’at va strategiya rivojiga qo‘shgan hissasini ilmiy jihatdan har tomonlama o‘rganishga, bu boradagi ilmiy tadqiqot natijalarini ommalashtirishga qaratildi. 

Tadbir davomida Amir Temur tuzuklarida aks etgan davlatchilik tamoyillari va jangchilar tarbiyasiga oid qadriyatlar zamonaviy Qurolli Kuchlarimiz xizmatchilarini tarbiyalash jarayonida qo‘llanilishi, yosh avlodni buyuk ajdodlarimizning munosib vorislari sifatida shakllantirishning dolzarb ahamiyati muhokama qilindi. Shu bilan birga, konferensiya ishtirokchilari strategik tafakkur, jangovar ruh va ma’naviy-fidoyilik mavzularida fikr almashib, tarixiy meros va zamonaviy tarbiyaviy jarayonlar o‘rtasidagi uzviy bog‘liqlikni yoritdi.

Yakunda Quruqlikdagi qo‘shinlar instituti rahbariyati barcha ishtirokchilarga o‘z minnatdorchiligini izhor qilib, faol qatnashganlar va mehmonlarga esdalik sovg‘alari va tashakkurnomalar topshirdi.

Mudofaa vazirligi Axborot va ommaviy kommunikatsiyalar departamenti