Surxondaryoda yoshlar kuni munosabati bilan keng qamrovli festival o‘tkazildi
2026-04-03 19:30:00 / Yangiliklar
Festival davomida yuzlab yoshlar turli yo‘nalishlarda o‘z iqtidor va qobiliyatlarini namoyon etdi. Tadbir doirasida madaniy-ma’rifiy, sport va innovatsion yo‘nalishlarda qator loyihalar hamda tanlovlar tashkil etildi. Jumladan, iqtidorli yoshlar ishtirokidagi sahna ko‘rinishlari va konsert dasturlari, “Zakovat” intellektual o‘yinlari, yosh ixtirochilar hamda tadbirkorlar loyihalari ko‘rgazmalari, milliy hunarmandchilik va san’at namoyishlari keng jamoatchilik e’tiborini tortdi.
Shuningdek, turli sport musobaqalari va ko‘rik-tanlovlar yoshlarning jismoniy faolligini oshirishga xizmat qildi. Festivalning o‘ziga xos jihatlaridan biri sifatida milliy qadriyatlarni targ‘ib etuvchi osh musobaqasi alohida e’tirof etildi. Unda ishtirokchilar turli hududlarga xos osh tayyorlash mahoratini namoyish etib, milliy taomlarimizning boy an’analari va o‘ziga xos jihatlarini keng targ‘ib qildi.
Tadbirning madaniy qismi doirasida iqtidorli yoshlar va san’atkorlar ishtirokida konsert dasturlari namoyish etildi. Ayniqsa, taniqli san’atkorlar ishtirokidagi gala konsert festivalga yanada tantanavor ruh bag‘ishlab, ishtirokchilarga unutilmas taassurotlar ulashdi.
Tadbir yakunida festival doirasida o‘tkazilgan musobaqa va tanlovlar g‘oliblari hamda faol ishtirokchilar tantanali ravishda taqdirlandi.