O‘zbekiston Respublikasi Mudofaa vazirligi

Mazkur anjumanda Qoraqalpog‘iston Respublikasidagi yetakchi oliy ta’lim muassasalarining professor-o‘qituvchilari, tajribali mutaxassislar, harbiy pedagoglar hamda soha ekspertlari ishtirok etib, harbiy kadrlar tayyorlash tizimini takomillashtirish, zamonaviy yondashuvlarni keng joriy etish va ta’lim sifatini oshirish masalalarini atroflicha muhokama qildi.

Davra suhbatida asosiy e’tibor harbiy xizmatchilarning jangovar shayligini mustahkamlash bilan bir qatorda, ularning bilim va ko‘nikmalarini tizimli ravishda rivojlantirish, eng muhimi, yuksak ma’naviy-ruhiy fazilatlarni shakllantirishga qaratildi. Ta’kidlanganidek, bugungi tezkor va murakkab vaziyatlarda samarali faoliyat yuritish uchun harbiy xizmatchilar keng dunyoqarashga ega, mustahkam ruhiy tayyorgarlikka ega hamda tahliliy fikrlash qobiliyatiga ega bo‘lishi zarur.

Anjumanning muhim yo‘nalishlaridan biri sifatida zamonaviy pedagogik yondashuvlar masalasi alohida e’tirof etildi. Xususan, ta’lim jarayonida psixologiyaning o‘rni chuqur ilmiy asosda tahlil qilinib, harbiy xizmatchilarning ruhiy barqarorligini mustahkamlash, stressga chidamliligini oshirish, favqulodda vaziyatlarda tezkor va oqilona qaror qabul qilish ko‘nikmalarini shakllantirishda psixologik tayyorgarlikning beqiyos ahamiyati qayd etildi.

Shuningdek, interfaol ta’lim metodlarini keng qo‘llash, innovatsion pedagogik texnologiyalarni amaliyotga joriy etish masalalari ham keng muhokama qilindi. Tinglovchilarni mustaqil fikrlashga undash, ularni real vaziyatlarga yaqinlashtirilgan mashg‘ulotlar orqali tayyorlash, muammoli vaziyatlarni modellashtirish asosida bilim berish bugungi kunning ustuvor talabi ekani ta’kidlandi.

Davra suhbatining eng dolzarb mavzularidan biri sifatida sun’iy intellekt texnologiyalarini ta’lim tizimiga integratsiya qilish masalasi ham keng yoritildi. Mutaxassislarning fikricha, sun’iy intellekt asosida yaratilayotgan o‘quv platformalari, simulyatsion dasturlar hamda analitik tizimlar harbiy kadrlar tayyorlash jarayonini sifat jihatidan yangi bosqichga olib chiqmoqda. Bunday texnologiyalar orqali tinglovchilarning individual salohiyatini aniqlash, ularning bilim darajasini tahlil qilish hamda o‘quv jarayonini shaxsga yo‘naltirilgan tarzda tashkil etish imkoniyati kengaymoqda.

Anjuman davomida ilgari surilgan ilmiy takliflar, amaliy tavsiyalar va innovatsion g‘oyalar harbiy ta’lim tizimini yanada rivojlantirish, uni xalqaro standartlar darajasiga olib chiqish, shuningdek, raqobatbardosh va yuqori malakali harbiy mutaxassislarni tayyorlashda muhim nazariy-metodologik asos bo‘lib xizmat qilishi alohida qayd etildi.