Navro'z — yangilanish, yasharish va mehr-oqibat timsoli bo‘lgan qadimiy bayram
2026-03-19 17:30:00 / Yangiliklar
Bahorning ilk nafasi bilan kirib keladigan Navro‘z xalqimiz hayotida alohida o‘rin tutadi. Bu kun bilan tabiat uyg‘onadi, insonlar qalbida yangi orzular va ezgu niyatlar paydo bo‘ladi. Yurtimizda ushbu sana umumxalq sayillari, milliy o‘yinlar va konsert dasturlari bilan keng nishonlanadi. Mahallalarda dasturxonlar yozilib, sumalak, halim kabi milliy taomlar tayyorlanadi, kattalar duoga qo‘l ochadi, yoshlar esa bayram shodiyonalarida faol ishtirok etadi.
Sana munosabat bilan Harbiy xavfsizlik va mudofaa universiteti tasarrufidagi Axborot-kommunikatsiya texnologiyalari va aloqa harbiy institutida bayram tadbiri tashkil etildi. Unda institut shaxsiy tarkibi faol qatnashib, milliy sport o‘yinlari o‘tkazildi. Xususan, arqon tortish, qo'l kurashi va shaxmat, shashka kabi bellashuvlar tashkil etilib, g‘oliblar rag‘batlantirildi.
Shuningdek, hududda bayramona dasturxon yozilib, sumalak, osh va boshqa milliy taomlar tayyorlandi. Bayram dasturi doirasida sahna chiqishlari, milliy raqslar va she’riy chiqishlar namoyish etildi.
Yakunda bellashuvlarda faol qatnashgan jamoalar institut rahbatiyati tomonidan diplom hamda esdalik sovg'alari bilan taqdirlandi.
Mudofaa vazirligi Axborot va ommaviy kommunikatsiyalar departamenti