O‘zbekiston Respublikasi Mudofaa vazirligi

Mazkur uchrashuvda Qurolli Kuchlar faxriylari, faol harbiy xizmatchilar hamda kelajak egalari bo‘lgan o‘quvchi-yoshlar bir davrada jam bo‘lib, bugun va ertangi kun o‘rtasidagi ma’naviy ko‘prik yana bir bor mustahkamlandi.

Faxriylar tomonidan aytilgan hayotiy voqealar, xizmat davridagi sinovlar, fidoyilik va jasoratga boy xotiralar yoshlar qalbida chuqur taassurot qoldirdi. Ularning har bir so‘zi — mardlik sabog‘i, har bir esdalik — tarixning tirik sahifasi bo‘lib yangradi. Bu suhbatlar orqali yoshlar Vatan himoyasi nafaqat sharaf, balki yuksak mas’uliyat ekanini yana bir bor anglab yetdilar.

Tadbir davomida o‘quvchi yoshlar tomonidan bildirilgan fikrlar va savollar uchrashuvga o‘zgacha ruh bag‘ishladi. Ular orqali yoshlarning Vatanga bo‘lgan cheksiz mehr-muhabbati, yurt tinchligi va osoyishtaligiga bo‘lgan e’tiqodi ifoda etildi. Bu esa, o‘z navbatida, avlodlar o‘rtasidagi ma’naviy uyg‘unlikning yorqin namunasiga aylandi.

Bugungi kunda yurtimizda yoshlarga qaratilayotgan e’tibor, ularning har tomonlama barkamol bo‘lib voyaga yetishi uchun yaratilayotgan imkoniyatlar, ayniqsa, ularni vatanparvarlik ruhida tarbiyalash borasidagi sa’y-harakatlar o‘zining yuksak samarasini bermoqda. Nukus shahridagi ushbu uchrashuv ana shu ezgu islohatning amaliy ifodasi bo‘ldi.

Shimoli-g'arbiy harbiy okrug matbuot xizmati