Sharqiy harbiy okrugda ilg‘or desant guruhi aniqlandi
2026-03-18 10:05:00 / Yangiliklar
“Men, g‘olib!” shiori ostida tashkil etilgan mazkur musobaqa dasturi oltita — o‘zaro uzviy bog‘liq va murakkab sinov bosqichlarini qamrab oldi. Dastlabki bosqichda ishtirokchilar yakka tartibda baholanib, to‘siqlar yo‘lagidan o‘tish, otish tayyorgarligi, parashyutlarni to‘g‘ri yeg‘ish, harbiy topografiya hamda ommaviy qirg‘in qurollaridan himoyalanish yo‘nalishlari bo‘yicha o‘z bilim, ko‘nikma va amaliy mahoratini namoyon etdi. Ushbu bosqich individual tayyorgarlik darajasini aniqlashda muhim mezon vazifasini o‘tadi.
Keyingi bosqichda jamoalar 10 kilometr masofaga yugurish orqali o‘zaro hamjihatlik, intizom va chidamlilik darajasini sinovdan o‘tkazdi. Uchinchi bosqichda jismoniy tayyorgarlik me’yorlari bajarilib, harbiy xizmatchilarning kuchi, bardoshliligi va jismoniy salohiyati kompleks baholandi.
To‘rtinchi va beshinchi bosqichlar musobaqaning eng murosasiz va keskin jarayonlari sifatida alohida ahamiyat kasb etdi. Ushbu bosqichlarda armiya qo‘l jangi hamda guruh tarkibida o‘tkazilgan biatlon bellashuvlari davomida ishtirokchilarning tezkor fikrlashi, aniq va muvofiqlashtirilgan harakatlari, shuningdek, taktik tayyorgarligi sinovdan o‘tkazildi. Jamoalar o‘zaro raqobat sharoitida yuqori natijalarga erishish uchun bor kuch va imkoniyatlarini safarbar etdi.
Yakuniy bosqichda esa ishtirokchilar majmuaviy mashg‘ulotlar asosida kompleks tarzda baholandi. Unda harbiy xizmatchilarning bo‘linma sifatida harakat qilish qobiliyati, murakkab va kutilmagan vaziyatlarda tezkor hamda to‘g‘ri qaror qabul qilish salohiyati, shuningdek, jangovar shayligi aniqlab olindi.
Yakuniy natijalarga ko‘ra, Farg‘ona garnizonidagi harbiy qism jamoalari birinchi va uchinchi o‘rinlarni egalladi. So‘x garnizonidagi harbiy qism jamoasi esa ikkinchi o‘ringa munosib ko‘rildi.
Sharqiy harbiy okrug matbuot xizmati