O‘zbekiston Respublikasi Mudofaa vazirligi

Nukus garnizonida joylashgan harbiy qismlarda qurol-aslaha va harbiy texnikalarni qishki sharoitdan yozgi mavsumda foydalanish rejimiga o‘tkazish bo‘yicha keng qamrovli amaliy mashg‘ulotlar tashkil etilmoqda.

Mashg‘ulotlar avvalida okrug qo'mondonligi tomonidan shaxsiy tarkibga mavsumiy texnik xizmat ko‘rsatish jarayonida bajarilishi lozim bo‘lgan ishlar tartibi, ularning hajmi hamda texnik xizmat ko‘rsatishning muhim jihatlari haqida batafsil tushuntirishlar berildi. Ta’kidlanganidek, ushbu jarayonning asosiy maqsadi qurol-aslaha va harbiy texnikalarni doimo yuqori jangovar shaylik darajasida saqlash, ularning turli ob-havo sharoitlarida uzluksiz va ishonchli faoliyat yuritishini ta’minlashdan iboratdir.

Shuningdek, mashg‘ulotlar davomida texnik vositalarning asosiy agregatlari va mexanizmlarini tekshirish, moylash tizimlarini moslashtirish, sovutish hamda yoqilg‘i tizimlarini mavsum talablariga muvofiqlashtirish, texnik vositalarning umumiy texnik holatini chuqur ko‘rikdan o‘tkazish kabi muhim amaliy ishlar amalga oshirilmoqda.

Belgilangan hududlarda harbiy texnikalarga mavsumiy xizmat ko‘rsatish ishlari yuqori tashkilotchilik, aniq reja va jadval asosida olib borilmoqda. Har bir texnik vosita sinchkovlik bilan ko‘zdan kechirilib, mutaxassislar tomonidan uning texnik holati baholanmoqda hamda zarur profilaktik ishlar amalga oshirilmoqda.

Bunday amaliy mashg‘ulotlar harbiy xizmatchilarning texnik bilim va ko‘nikmalarini mustahkamlash, texnikaga mas’uliyat bilan munosabatda bo‘lish madaniyatini shakllantirish, eng muhimi jangovar salohiyatini yanada oshirishga xizmat qilmoqda.

Shimoli-g'arbiy harbiy okrug matbuot xizmati