O‘zbekiston Respublikasi Mudofaa vazirligi

Tadbir doirasida dastlab loyiha ishtirokchilari 10 kun davom etadigan harbiy o‘quv-yig‘in tartib-qoidalari bilan batafsil tanishtirildi. Yig‘in davomida amal qilinadigan ichki tartib, mashg‘ulotlar rejasi hamda harbiy intizom talablariga oid tushuntirishlar berildi. Shundan so‘ng ishtirokchilar belgilangan tartibda tibbiy ko‘rikdan o‘tkazilib, ularga maxsus harbiy kiyimlar topshirildi.

“Jasorat maktabi” loyihasi doirasida ishtirokchilar uchun ijtimoiy film ham namoyish etildi. Filmda giyohvandlik illatining yoshlar hayotiga yetkazadigan og‘ir oqibatlari, inson salomatligi va kelajagiga ko‘rsatadigan salbiy ta’siri ta’sirchan voqealar orqali yoritib berilgan. Tomosha jarayonida yoshlar zararli odatlarning naqadar xavfli ekanini yana bir bor anglab yetib, sog‘lom turmush tarzini tanlash muhimligini chuqurroq his etdi.

Film namoyishidan so‘ng loyiha ishtirokchilari bilan ochiq muloqot tashkil etildi. Unda filmda ko‘tarilgan dolzarb masalalar yuzasidan fikr almashilib, yoshlar o‘z mulohazalarini bildirdi. Suhbat davomida zararli odatlardan yiroq bo‘lish, jamiyatda faol, ongli va mas’uliyatli fuqaro bo‘lib voyaga yetish har bir yoshning muhim vazifasi ekani alohida ta’kidlandi.

Eslatib o‘tamiz, 10 kun davom etadigan mazkur yig‘in davomida yoshlar jangovar tayyorgarlik, sport musobaqalari, ma’naviy-ma’rifiy mashg‘ulotlar hamda zamonaviy kasb-hunarlar bo‘yicha yo‘naltiruvchi mashg‘ulotlarga jalb etiladi.

Sharqiy harbiy okrug matbuot xizmati