Bektemirda “Vatan tayanchi” otryad a’zolariga ko‘krak nishonlari topshirildi
2026-03-14 20:00:00 / Yangiliklar
Poytaxtimizning Bektemir tumanidagi 358-sonli maktabda oʻtkazilgan tadbirda davlat va jamoat tashkilotlari vakillari, harbiy xizmatchilar, oʻqituvchilar, oʻquvchi-yoshlar va ota-onalar ishtirok etdi.
Ochilish qismida Bosh prokuror oʻrinbosari – Oʻzbekiston Respublikasi Harbiy prokurori O.Xolboyev tomonidan Prezidentimizning yoshlarga boʻlgan alohida eʼtibori va gʻamxoʻrligi, keng imkoniyat, imtiyoz va afzalliklar, shuningdek, Davlatimiz Rahbarining 24-fevralda yoshlar bilan oʻtkazgan ochiq muloqotining mohiyati va ahamiyati eʼtirof etib oʻtildi.
Soʻngra tumandagi 10 ta maktabning har biridan 20 nafardan jami 200 nafar oʻquvchiga “Vatan tayanchi” koʻkrak belgisi va maxsus guvohnomalar tantanali ravishda topshirildi.
Jarayon vatanparvarlik tadbiriga ulanib ketdi. Vatan haqida harbiy orkestr tomonidan jonli ijro etilgan kuy-qoʻshiqlar, faxriy qorovul va maxsus boʻlinmaning koʻrgazmali chiqishlari qatnashchilar qalbidagi vatanparvarlik hissini joʻshqinlantirdi. Harbiy qurol-aslahalar koʻrgazmasi ham barchada katta taassurot qoldirdi.