Oltinko‘lda Mudofaa ishlari bo‘limining yangi binosi foydalanishga topshirildi
2026-03-03 15:40:00 / Yangiliklar
Ochilish marosimida Sharqiy harbiy okrug qo‘mondonligi, tuman hokimligi vakillari, sektor rahbarlari, jamoatchilik faollari, nuroniylar, yoshlar hamda harbiy xizmatchilar ishtirok etdi.
Marosimda so‘zga chiqqanlar mamlakatimizda mudofaa sohasini modernizatsiya qilish, harbiy boshqaruv tizimini raqamlashtirish, chaqiruv va safarbarlik jarayonlarini shaffof hamda tizimli yo‘lga qo‘yish borasida amalga oshirilayotgan keng ko‘lamli chora-tadbirlar haqida atroflicha fikr bildirdi.
Qayd etilganidek, yangi bino zamonaviy loyiha asosida barpo etilgan bo‘lib, unda xodimlar uchun qulay va samarali mehnat sharoitlari yaratilgan. Ma’muriy va xizmat xonalari, arxiv, fuqarolarni qabul qilish bo‘limlari, kutish zallari hamda majlislar xonasi zamon talablariga mos ravishda jihozlangan. Binoda zamonaviy axborot-kommunikatsiya texnologiyalari joriy etilgani murojaatlarni tezkor ko‘rib chiqish, hujjat aylanishini optimallashtirish va hisob-kitob ishlarini aniq hamda ishonchli yuritish imkonini beradi.
Shuningdek, fuqarolarni qabul qilish jarayonini ochiq va qulay tashkil etish maqsadida alohida infratuzilma yo‘lga qo‘yilgan. Bu esa chaqiruv jarayonlarini tartibli, shaffof va inson omiliga bog‘liq noqulayliklarsiz amalga oshirish, aholi bilan bevosita muloqotni mustahkamlashga xizmat qiladi. Yaratilgan sharoitlar harbiy xizmatga chaqiriluvchilar va ularning ota-onalari uchun ham qulaylik yaratadi.
Tadbir davomida so‘z olgan nuroniylar va harbiy xizmatchilar yurt tinchligi va osoyishtaligini ta’minlash, yoshlarni Vatanga sadoqat ruhida tarbiyalash, ularni harbiy xizmatga puxta tayyorlash masalalari ustuvor vazifa ekanini ta’kidladi. Yangi ma’muriy bino nafaqat xizmat faoliyatini samarali tashkil etish, balki harbiy-vatanparvarlik yo‘nalishidagi targ‘ibot-tashviqot tadbirlarini o‘tkazish uchun ham keng imkoniyatlar yaratishi qayd etildi.
Marosim yakunida ishtirokchilar yangi binoda yaratilgan sharoitlar bilan yaqindan tanishdi hamda amalga oshirilgan bunyodkorlik ishlariga yuqori baho berdi. Ta’kidlanishicha, mazkur inshootning foydalanishga topshirilishi hududda mudofaa salohiyatini yanada mustahkamlash, harbiy boshqaruv tizimini zamonaviy talablarga mos ravishda rivojlantirish va aholi bilan samarali hamkorlikni yo‘lga qo‘yishda muhim ahamiyat kasb etadi.
Sharqiy harbiy okrug matbuot xizmati