Namanganda Yoshlar kuni ko‘tarinki ruhda nishonlandi
2026-02-28 10:10:00 / Yangiliklar
Namangan viloyatining Pop tumanidagi 16-maktab hamda Norin tumanida Yoshlar kuni munosabati bilan mazmunli tadbirlar tashkil etildi. Tadbirlarda Sharqiy harbiy okrugning Namangan garnizonidagi harbiy qism harbiy xizmatchilari, harbiy orkestr jamoasi, viloyat va tuman hokimliklari vakillari hamda keng jamoatchilik ishtirok etdi.
Bayram doirasida harbiy texnika va qurol-aslahalar ko‘rgazmasi namoyish etilib, yoshlar zamonaviy harbiy jihozlar hamda Vatan himoyachilarining xizmat faoliyati bilan yaqindan tanishdilar. Shuningdek, sport musobaqalari, jismoniy bellashuvlar va ochiq muloqotlar tashkil etildi.
Norin tumanidagi sport maktabida o‘tkazilgan musobaqalar va “Zakovat” intellektual o‘yini yoshlarning bilim, tezkor fikrlash va jamoaviylik ko‘nikmalarini namoyon etishiga xizmat qildi.
Tadbir yakunida g‘olib va faol ishtirokchilar taqdirlandi. Mazkur tadbirlar yoshlarning bo‘sh vaqtini mazmunli tashkil etish, sog‘lom turmush tarzini targ‘ib qilish hamda ularning intellektual va jismoniy salohiyatini qo‘llab-quvvatlashga qaratildi.
Sharqiy harbiy okrug matbuot xizmati