Janubda ham “Kiberxavfsizlik” oyligi doirasida profilaktik tadbirlar davom etmoqda
2026-02-28 09:00:00 / Yangiliklar
Surxondaryo viloyat Ichki ishlar boshqarmasi kiberxavfsizlik mutaxassislari hamkorligida o‘tgan tadbir mazmuni harbiy qism shaxsiy tarkibini kiberjinoyatlar va ulardan himoyalanish usullari borasidagi bilimlarini mustahkamlashga qaratildi.
Ma’lumki kiberhujumlarda jabrlanishning eng asosiy sabablari zarur zamonaviy bilim va ko‘nikmaga ega bo‘lmaslik hamda loqaydlikdir. Tadbir davomida mutaxassislar tomonidan shubhali vaziyatlarda amalga oshirish lozim bo‘lgan ishlar haqida batafsil tushunchalar berildi.
Xizmat vazifasini bajarish chog‘ida har qanday ma’lumotdan foydalanishda ogoh bo‘lish, konfidensial ma’lumotlar sizib chiqishini oldini olishga qaratilgan ko‘rsatmalar berilib, soxta saytlarni haqiqiysidan ajratish usullari amaliy ko‘rsatildi. Shuningdek tavakkalchilikka asoslangan o‘yinlarning salbiy oqibatlari haqida mulohaza qilishga undovchi fikrlar o‘rtaga tashlandi. “OneID” tizimidagi login va parollarni o‘zgartirish, “Mygov” ilovasi orqali kredit olishga cheklov qo‘yish tartibi o‘rgatildi.
Uyali aloqa vositasida yoki kompyuterda telegram ilovasi orqali keladigan zararli dasturlarni aniqlash, telegramm hisoblar ulangan qurilmalarni doimiy nazorat qilish va unda ikki bosqichli parol joylashtirish kabi himoya usullarining ketma-ketligi videoqo‘llanma orqali namoyish etildi.
Janubi-g‘arbiy maxsus harbiy okrug matbuot xizmati