O‘zbekiston Respublikasi Mudofaa vazirligi

Tibbiy ko‘riklar malakali shifokor-mutaxassislar tomonidan bir necha bosqichda amalga oshirildi. Xususan, terapevt, jarroh, nevropatolog, stomatolog, dermatolog, otorinolaringolog hamda boshqa tor yo‘nalishdagi shifokorlar tomonidan har bir chaqiriluvchi individual tartibda atroflicha tekshiruvdan o‘tkazildi. Tekshiruvlar davomida organizmning umumiy funksional holati, surunkali kasalliklar mavjudligi yoki yo‘qligi, ko‘rish va eshitish qobiliyati, og‘iz bo‘shlig‘i hamda teri qoplami holati batafsil o‘rganildi.

Shuningdek, antropometrik o‘lchovlar asosida bo‘y, vazn, ko‘krak qafasi aylanasi va boshqa jismoniy ko‘rsatkichlar aniqlanib, belgilangan me’yorlar bilan solishtirildi. Zarur hollarda qo‘shimcha laborator va instrumental tekshiruvlar tayinlanib, yakuniy tibbiy xulosa komissiya tomonidan kollegial tarzda qabul qilindi.

Jarayonlar zamonaviy tibbiy asbob-uskunalar bilan jihozlangan xonalarda, sanitariya-gigiyena qoidalariga to‘liq rioya etilgan holda olib borildi. Har bir chaqiriluvchi bo‘yicha tibbiy hujjatlar rasmiylashtirilib, natijalar belgilangan tartibda qayd etildi.

Tadbir davomida yoshlarning huquq va qonuniy manfaatlari to‘liq kafolatlandi, ularga tibbiy xulosalar yuzasidan batafsil tushuntirishlar berildi. Shuningdek, sog‘lig‘ida muayyan muammo aniqlangan chaqiriluvchilarga zarur tavsiyalar berilib, belgilangan tartibda qo‘shimcha davolanish yoki kuzatuv choralarini ko‘rish masalalari ko‘rib chiqildi.

Mudofaa vazirligi Axborot va ommaviy kommunikatsiyalar departamenti