Kiberhujumlarga qarshi tizimli choralar va shaxsiy mas’uliyat
2026-02-25 14:20:00 / Yangiliklar
Tadbir Kiberxavfsizlik oyligi doirasida tashkil etilib, unda Zarafshon shahar Ichki ishlar bo‘limi mas’ul xodimi, harbiy qism rahbariyati hamda harbiy xizmatchilar ishtirok etdi.
Davra suhbati davomida bugungi raqamli davrda yuzaga kelayotgan axborot tahdidlari, internet tarmog‘ida kuzatilayotgan firibgarlik sxemalari, fishing xabarlari, zararli havolalar, ijtimoiy tarmoqlardagi soxta sahifalar va boshqa kiberjinoyatlarning salbiy oqibatlari haqida atroflicha ma’lumot berildi. Xususan, xizmat faoliyati jarayonida axborot bilan ishlashda ehtiyotkorlikni kuchaytirish, maxfiy ma’lumotlarni ishonchli saqlash hamda ularning tarqalib ketishining oldini olish masalalariga alohida e’tibor qaratildi.
Mutaxassis tomonidan real misollar asosida kiberhujumlarning sodir etilish usullari, ularni aniqlash va bartaraf etish mexanizmlari tushuntirildi. Shuningdek, shaxsiy ma’lumotlarni himoya qilish, murakkab parollardan foydalanish, ikki bosqichli himoya vositalarini qo‘llash, shubhali havola va fayllarni ochmaslik, rasmiy manbalardan foydalanish kabi amaliy tavsiyalar berildi.
Tadbir jarayonida harbiy xizmatchilarning savollariga batafsil javoblar qaytarilib, axborot xavfsizligi qoidalariga qat’iy rioya etish harbiy intizom va xizmat mas’uliyatining ajralmas qismi ekani alohida ta’kidlandi.
Yakunda mavzuga doir targ‘ibot materiallari va eslatma bukletlar tarqatildi.
Toifalangan obyektlarni qo‘riqlash qo‘shinlari qo‘mondonligi matbuot xizmati