O‘zbekiston Respublikasi Mudofaa vazirligi

Tadbirda xizmat o‘tayotgan muddatli harbiy xizmatchilarga okrug kiberxavfsizlik markazi mutaxassislari tomonidan tavakkalchilikka asoslangan onlayn o‘yinlar va ularning xavf-xatarlari tushuntirildi. Shuningdek, bunday o‘yinlarda yutish imkoniyati yo‘qligi ilmiy dalillar bilan isbotlandi.

Harbiy xizmatchilarga noqonuniy onlayn savdo platformalarida ishtirok etishning salbiy oqibatlari, shuningdek, kiberjinoyatlarga uchrash ehtimoli va kelib chiqishi mumkin bo‘lgan muammoli vaziyatlar batafsil tushuntirildi. Tadbir davomida “OneID” tizimidagi login va parollarni muntazam o‘zgartirish, “MyGov” ilovasi orqali kredit olish imkoniyatlariga cheklov qo‘yish kabi zarur kiberxavfsizlik choralariga urg‘u berildi.

Shuningdek, ijtimoiy tarmoqlardan foydalanishda extiyotkorlik, harbiy libosdagi fotosuratlarni e’lon qilmaslik va taqiqlangan bloglar yoki veb-saytlarni kuzatmaslik bo‘yicha aniq yo‘riqnomalar berildi. Telegram orqali keladigan zararli dasturlarni aniqlash, hisoblar ulangan qurilmalarni nazorat qilish va ikki bosqichli autentifikatsiya orqali hisoblarni himoyalash bo‘yicha amaliy ko‘nikmalar shakllantirildi. Mobil qurilmalarda zararli ilovalarni aniqlash va ularni o‘chirish usullari bo‘yicha ham tajriba mashg‘ulotlari o‘tkazildi.

Tadbir yakunida harbiy xizmatchilarda kiberxavfsizlik madaniyatini oshirish, onlayn faoliyatni xavfsiz tarzda tashkil etish va kiberhujumlardan himoyalanish bo‘yicha zarur bilim va ko‘nikmalar hosil qilgani ta’kidlandi.

Janubi-g‘arbiy maxsus harbiy okrug matbuot xizmati