O‘zbekiston Respublikasi Mudofaa vazirligi

Mazkur hujjat ikki ta’lim muassasasi o‘rtasida ilmiy, amaliy va ta’lim yo‘nalishlarda tizimli hamkorlikni yo‘lga qo‘yish, mavjud salohiyatni birlashtirish hamda zamonaviy tahdid va xavf-xatarlarga qarshi samarali javob mexanizmlarini ishlab chiqishga qaratilgani bilan ahamiyatlidir.

Memorandumga muvofiq, tomonlar ta’lim jarayonida pedagogik-psixologik muammolarni chuqur o‘rganish, milliy, mintaqaviy va xalqaro xavfsizlikning dolzarb masalalari yuzasidan ishchi guruhlar faoliyatini yo‘lga qo‘yadi. Shuningdek, o‘zaro manfaatli va dolzarb mavzular bo‘yicha professor-o‘qituvchilar tarkibi, tinglovchilar hamda kursantlar ishtirokida nazariy va amaliy mashg‘ulotlar tashkil etiladi.

Hamkorlik doirasida shaxsiy tarkibning kasbiy tayyorgarligini oshirish maqsadida qisqa muddatli malaka oshirish kurslari, maxsus o‘quv dasturlari va maqsadli seminar-treninglar o‘tkazish rejalashtirilgan. Zamonaviy qurolli mojarolar tendensiyalarini tahlil qilish asosida axborot-tahliliy materiallar, ilmiy xulosalar va amaliy tavsiyalarni birgalikda ishlab chiqish ham ustuvor vazifalardan etib belgilandi.

Tomonlar ochiq darslar, mahorat saboqlari (master-klasslar), ilmiy-nazariy va ilmiy-amaliy anjumanlar, seminarlar hamda ishchi uchrashuvlarni muntazam tashkil etish orqali o‘zaro tajriba almashinuvini kengaytiradi.

Memorandum doirasida o‘quv-moddiy texnik baza va infratuzilma resurslaridan samarali foydalanish, tegishli yo‘nalishlar bo‘yicha o‘zaro masofaviy ta’lim tizimini joriy etish, amaliyot va stajirovkalarni tashkil qilish, shuningdek, o‘quv jarayoniga zamonaviy axborot-kommunikatsiya texnologiyalarini keng tatbiq etish ko‘zda tutilgan.

Alohida qayd etish joizki, mazkur xujjatni izchil amalga oshirilishi natijasida harbiy va huquqni muhofaza qilish sohalarida zamonaviy tahdid va chaqiriqlarga munosib javob bera oladigan, yuqori professional salohiyatga ega mutaxassislar tayyorlash imkoniyati yanada kengayadi.