O‘zbekiston Respublikasi Mudofaa vazirligi

Tadbir doirasida yosh harbiy xizmatchilar bilan ochiq va samimiy muloqot tashkil etilib, ularning kelgusidagi rejalari, kasbiy maqsadlari, ta’limni davom ettirish hamda bandlik masalalariga oid fikr-mulohazalari tinglandi. Uchrashuv davomida har bir murojaatga alohida e’tibor qaratilib, yoshlarning jamiyat hayotida munosib o‘rin egallashlari, o‘z salohiyatini to‘liq ro‘yobga chiqarishlari uchun mavjud imkoniyat va shart-sharoitlar yuzasidan batafsil tushuntirishlar berildi.

Рarbiy-ma’muriy sektor rahbari bugungi kunda yoshlar siyosati doirasida amalga oshirilayotgan islohotlar, xususan, oliy va professional ta’lim tizimidagi yangilanishlar, kasb-hunar egallash va tadbirkorlik faoliyatini boshlash uchun yaratilayotgan imkoniyatlar haqida to‘xtalib o‘tdi. Harbiy xizmatni muvaffaqiyatli yakunlagan yigitlar uchun davlat dasturlari asosida imtiyozli kreditlar ajratish, bandlikka ko‘maklashish hamda ularni aniq yo‘nalishlar bo‘yicha kasbga yo‘naltirish mexanizmlari mavjudligi qayd etildi.

Ta’kidlanganidek, Vatan himoyachisi degan yuksak nom yigitlardan nafaqat xizmat davrida, balki butun umr davomida sadoqat, fidoyilik va yuksak mas’uliyatni talab etadi. Harbiy xizmat esa yoshlar uchun chinakam hayot maktabi bo‘lib, ularda intizom, matonat, tashabbuskorlik va jamoaviylik fazilatlarini shakllantiradi. Shu ma’noda, xizmatni sharaf bilan ado etgan yoshlar kelgusida mamlakatimiz taraqqiyotiga munosib hissa qo‘shadigan, zamonaviy bilim va ko‘nikmalarga ega, vatanparvar kadrlar bo‘lib yetishishlariga qat’iy ishonch bildirildi.

Uchrashuv yakunida yosh harbiy xizmatchilar tomonidan bildirilgan taklif va tashabbuslar qo‘llab-quvvatlanishi, ularning ijtimoiy-iqtisodiy hayotda faol ishtirok etishi uchun zarur tashkiliy va amaliy choralar ko‘rilishi qayd etildi. 

 Janubi-g‘arbiy harbiy okrug  matbuot xizmati