O‘zbekiston Respublikasi Mudofaa vazirligi

Tadbirda qo‘mondonlikning korrupsiyaga qarshi ichki nazorat bo‘limi mas’ullari, gospital rahbariyati hamda tibbiyot xodimlari ishtirok etdi.

Davra suhbati davomida sog‘liqni saqlash tizimida, xususan harbiy tibbiyot muassasalarida korrupsiyaviy omillarning oldini olish, xizmat jarayonlarini adolat, qonuniylik va professional etika tamoyillari asosida tashkil etish masalalari atroflicha muhokama qilindi. Ishtirokchilar tomonidan fuqarolar va harbiy xizmatchilarga sifatli, o‘z vaqtida hamda shaffof tibbiy xizmat ko‘rsatish tizimini takomillashtirish bugungi kunning dolzarb vazifasi ekani alohida ta’kidlandi.

Muloqot jarayonida davlatimiz rahbarining 2025-yil 26-dekabrdagi Murojaatnomasida belgilab berilgan ustuvor yo‘nalishlarga alohida e’tibor qaratildi. Xususan, davlat boshqaruvi tizimida ochiqlik va hisobdorlikni kuchaytirish, korrupsiyaning barcha ko‘rinishlariga qarshi qat’iy va tizimli kurashish, xalq ishonchini mustahkamlash har bir rahbar va xodimning ustuvor vazifasi ekani qayd etildi. Ta’kidlanganidek, korrupsiyaga qarshi kurashish nafaqat huquqiy, balki ma’naviy-ma’rifiy yondashuvni ham talab etadi.

Shuningdek, 2026-yilning mamlakatimizda “Korrupsiyaga qarshi favqulodda holat yili” deb e’lon qilingani soha xodimlari zimmasiga yanada katta mas’uliyat yuklashi qayd etildi. Bu borada har bir tibbiyot xodimi o‘z faoliyatini “halollik vaksinasi” tamoyili asosida yo‘lga qo‘yishi, ya’ni har qanday manfaatdorlik, tanish-bilishchilik, xizmat vakolatini suiiste’mol qilish yoki noqonuniy harakatlarga mutlaqo yo‘l qo‘ymasligi ta’kidlandi.

Tadbir davomida ichki nazorat tizimini yanada takomillashtirish, xizmat jarayonlarini raqamlashtirish orqali inson omilini qisqartirish, murojaatlarni ko‘rib chiqishda ochiq va shaffof mexanizmlarni joriy etish, shuningdek, jamoada sog‘lom ma’naviy-psixologik muhitni mustahkamlash bo‘yicha aniq taklif va tashabbuslar ilgari surildi. Korrupsiyaga oid har qanday holat bo‘yicha murosasiz munosabatni shakllantirish, profilaktik tadbirlarni tizimli tashkil etish hamda xodimlarning huquqiy savodxonligini oshirish yuzasidan kelishib olindi.

Davra suhbati yakunida ishtirokchilar tomonidan korrupsiyaga qarshi kurashish har bir xodimning shaxsiy mas’uliyati ekani, ochiqlik va shaffoflik tamoyillari asosida faoliyat yuritish esa muassasaning obro‘-e’tiborini yanada mustahkamlashi e’tirof etildi.