O‘zbekiston Respublikasi Mudofaa vazirligi

Mazkur Farmonga muvofiq, 2025/2026 o‘quv yilidan boshlab bitiruvchi bosqich kursantlari uchun tanlov asosida “Oliy Bosh Qo‘mondon” davlat stipendiyasi joriy etildi. Ushbu nufuzli stipendiya Harbiy xavfsizlik va mudofaa universiteti hamda uning tasarrufidagi institutlarda tahsil olayotgan eng munosib, bilimli va namunali to‘rt nafar bitiruvchi kursantga topshirildi.
Stipendiya sohiblari bo‘lgan kursantlarning ota-onalari va yaqinlariga Harbiy xavfsizlik va mudofaa universiteti rahbariyati tomonidan joylarda tantanali tarzda tashakkurnomalar yetkazildi. Jumladan, Qashqadaryo viloyati Shahrisabz tumani, Namangan viloyati Norin tumani, Farg‘ona viloyati Toshloq va Qo‘shtepa tumanlarida ushbu munosabat bilan ma’naviy-ma’rifiy tadbirlar tashkil etildi.
Mazkur tadbirlarda Harbiy xavfsizlik va mudofaa universitetining Sharqiy harbiy okrug hamda Janubi-g‘arbiy maxsus harbiy okrug o‘quv fakultetlari rahbariyati va professor-o‘qituvchilaridan iborat jamoa, tuman hokimliklari vakillari, kursantlarga ilk ta’lim bergan maktab o‘qituvchilari, yoshlar hamda keng jamoatchilik ishtirok etdi.
Tadbirlar davomida so‘zga chiqqanlar tomonidan yosh avlodni harbiy xizmatga tayyorlash, ularni Vatanga sadoqat, fidoyilik va mas’uliyat ruhida tarbiyalash, ta’lim va tarbiya jarayonlarida uzviylikni ta’minlash masalalariga alohida urg‘u berildi. Shuningdek, bugungi yutuqlar kelgusida yurt tinchligi va xavfsizligini ta’minlaydigan malakali, zamonaviy fikrlaydigan va fidoyi harbiy kadrlar yetishib chiqishiga mustahkam zamin yaratishi ta’kidlandi.
Tadbir yakunida stipendiya sohiblarining ota-onalariga farzandlarini Vatanga muhabbat, intizom va yuksak bilim ruhida tarbiyalab voyaga yetkazgani uchun Harbiy xavfsizlik va mudofaa universiteti rahbariyati nomidan tashakkurnomalar tantanali ravishda topshirildi. 
Eslatib o‘tamiz, ushbu stipendiya sohiblari bakalavriat bosqichini tamomlaganidan so‘ng, besh yil davomida oliy harbiy ta’lim muassasalarining magistratura bosqichiga imtihonlarsiz qabul qilinish huquqiga ega bo‘ladi.

Mudofaa vazirligi Axborot va ommaviy kommunikatsiyalar departamenti