Farg‘onada buyuk mutafakkir xotirasiga yuksak ehtirom ko‘rsatildi
2026-02-09 13:40:00 / Yangiliklar
Tadbirda viloyat hokimligi vakillari, Sharqiy harbiy okrug mas’ullari, davlat va jamoat tashkilotlari mutasaddilari, ta’lim muassasalari pedagoglari, yoshlar va maktab o‘quvchilari ishtirok etdi. Yig‘ilganlar buyuk ajdodimiz haykali poyiga gulchambarlar qo‘yib, uning xotirasiga chuqur ehtirom bajo keltirdilar.
Marosimda so‘zga chiqqanlar Alisher Navoiyning o‘zbek adabiyoti, ona tilimiz va milliy ma’naviyatimiz taraqqiyotidagi beqiyos xizmatlarini alohida ta’kidladilar. Uning ilm-fan, adolat, insonparvarlik va komillik g‘oyalari bugun ham jamiyatimiz rivojiga yo‘l ko‘rsatib, yosh avlodni ezgulikka chorlab kelayotgani qayd etildi.
Shundan so‘ng maydonda adabiy-badiiy chiqishlar namoyish etildi. Ijodkor yoshlar va o‘quvchilar tomonidan shoir g‘azallaridan namunalar o‘qildi, kuy-qo‘shiqlar ijro etildi. Dilbar satrlar va jarangdor navolar yig‘ilganlarga ko‘tarinki ruh, ma’naviy zavq va ilhom bag‘ishladi.
Sana munosababti bilan tashkil etilayotgan tadbirlar Sharqiy harbiy okrug Ma’naviyat va ma’rifat markazidagi “Navoiy merosi — millat ruhiyati ko‘zgusi” mavzusidagi turli madaniy-ma’rifiy tadbir bilan davom etdi.
Unda ishtirokchilar buyuk shoirning serqirra hayoti va ijodi bilan yaqindan tanishib, uning hikmatlarga boy asarlari orqali milliy o‘zlik, ma’naviyat va insoniy fazilatlar haqida chuqurroq tasavvurga ega bo‘ldilar.
Dastur doirasida “Navoiy siymosi – yoshlar nigohida” mavzusida rasmlar tanlovi, mutaxassislarning mazmunli ma’ruzalari, nazm va navo kechalari, sahna ko‘rinishlari hamda yosh ijodkorlar chiqishlari tashkil etilib, tadbir ishtirokchilarida katta taassurot qoldirdi.
Shuningdek, yoshlarning kitobxonlik madaniyatini oshirish, ijodiy salohiyatini yuzaga chiqarish va ularni ma’naviy-ma’rifiy muhitga keng jalb etishga qaratilgan muloqot hamda uchrashuvlar ham o‘tkazildi.
Sharqiy harbiy okrug matbuot xizmati