O‘zbekiston Respublikasi Mudofaa vazirligi

Tantanali tadbirda markaz shaxsiy tarkibi, davlat va jamoat tashkilotlari vakillari, harbiy soha faxriylari, xizmatni sharaf bilan o‘tayotgan harbiy xizmatchilar hamda mehmonlar ishtirok etdi.

Tadbir davomida ishtirokchilarga mamlakatimiz Qurolli Kuchlarida olib borilayotgan keng ko‘lamli islohotlar, Navigatsiya-topogeodiziya markazining tashkil topish tarixi, bosib o‘tilgan yo‘li va bugungi kundagi faoliyati haqida batafsil ma’lumotlar taqdim etildi.

So‘zga chiqqanlar markazning o‘ziga xos boy tarixiy an’analarga ega ekanini, uning faoliyati Vatanga sadoqat, fidoyilik va yuksak mas’uliyat tamoyillariga asoslanganini alohida ta’kidladi.

Tadbirda qayd etilganidek, so‘nggi yillarda Navigatsiya-topogeodiziya markazida keng ko‘lamli modernizatsiya va yangilanish ishlari amalga oshirildi. Moddiy-texnik baza tubdan mustahkamlanib, markaz zamonaviy texnika va ilg‘or texnologiyalar bilan jihozlandi. Bu esa harbiy bo‘linmaning xizmat samaradorligini oshirish, belgilangan vazifalarni yanada aniq va sifatli bajarishga xizmat qilmoqda.

Bayram tadbiri davomida harbiy qism jamoasining erishayotgan yutuqlari yana bir bor e’tirof etildi. Shaxsiy tarkibga bayram tabrigi o‘qib eshittirilib, xizmat burchini namunali tarzda bajarayotgan bir guruh harbiy xizmatchilar faxriy yorliqlar hamda esdalik sovg‘alari bilan taqdirlandi.

Bayramona ruhda o‘tgan tadbirning badiiy qismida Qurolli Kuchlar Markaziy ashula va raqs ansambili ijrosida vatanparvarlik ruhidagi kuy-qo‘shiqlar yangrab, ishtirokchilarga ko‘tarinki kayfiyat ulashdi.

Mudofaa vazirligi Axborot va ommaviy kommunikatsiyalar departamenti