O‘zbekiston Respublikasi Mudofaa vazirligi

Mazkur yig‘ilishda harbiy kadrlar tayyorlash tizimini tubdan takomillashtirish, harbiy xizmatni yoshlar uchun nafaqat vatanparvarlik maktabi, balki hayotiy va kasbiy rivojlanish bosqichiga aylantirish bo‘yicha aniq vazifalar belgilab berilgan edi. Xususan, muddatli harbiy xizmatni o‘tayotgan yoshlarning xizmat davomida kamida bitta kasb egallashini ta’minlashga qaratilgan mutlaqo yangi tizimni joriy etish zarurligi alohida ta’kidlandi.

Ushbu vazifalar ijrosini ta’minlash maqsadida bugungi kunda respublikamiz bo‘ylab qator amaliy chora-tadbirlar izchil amalga oshirilmoqda. Jumladan, O‘zbekiston Respublikasi Harbiy xavfsizlik va mudofaa universiteti Serjantlar tayyorlash oliy maktabida hamda Markaziy harbiy okrug tasarrufidagi harbiy qism va muassasalarda muddatli harbiy xizmatchilar bilan tizimli va samarali ishlar olib borilmoqda.

Ana shunday amaliy tashabbuslardan biri Samarqand shahrida joylashgan 6-sonli texnikum bilan hamkorlikda tashkil etildi. Ushbu hamkorlik doirasida texnikumning malakali pedagog-o‘qituvchilari tomonidan muddatli harbiy xizmatchilar uchun kasbga yo‘naltirilgan tushuntirish va targ‘ibot tadbirlari o‘tkazildi.

Uchrashuvlar davomida texnikumda mavjud kasb-hunar yo‘nalishlari, o‘qishga qabul qilish shartlari, qisqa muddatli o‘quv kurslarining mazmuni, o‘quv jarayonining tashkil etilishi hamda bitiruvchilar uchun yaratilayotgan imkoniyatlar haqida batafsil ma’lumotlar berildi. Shuningdek, muddatli harbiy xizmatchilarning qiziqishlari va layoqatlarini inobatga olgan holda dastlabki nazariy va amaliy mashg‘ulotlar tashkil etildi.

Amaliy ishlarning mantiqiy davomi sifatida Samarqand shahar 6-sonli texnikumida Markaziy harbiy okrug bilan hamkorlikda muddatli harbiy xizmatchilar uchun qisqa muddatli kasbiy o‘quv kurslari yo‘lga qo‘yildi. Ushbu kurslar doirasida askarlar avtomobillarga texnik xizmat ko‘rsatish va ta’mirlash, kompyuter grafikasi, ingliz tili hamda rus tili yo‘nalishlari bo‘yicha nazariy va amaliy bilim va ko‘nikmalarga ega bo‘lish imkoniyatiga ega bo‘lmoqda.

Ta’kidlash joizki, mazkur tashabbuslar muddatli harbiy xizmatchilarning nafaqat harbiy tayyorgarligini mustahkamlashga, balki ularning xizmatdan keyingi hayotda munosib o‘rin egallashi, bandligini ta’minlash hamda jamiyatda faol, raqobatbardosh va malakali mutaxassis sifatida shakllanishiga xizmat qilishi bilan alohida ahamiyat kasb etadi.

Markaziy harbiy okrug matbuot xizmati