Oʻzbekiston va Turkiya harbiy hamkorlik toʻgʻrisida yangi bitimni imzoladi
2026-01-20 19:20:00 / Yangiliklar
Turkiya milliy mudofaa vaziri Yashar Guler Oʻzbekiston Respublikasi mudofaa vaziri general-leytenant Shuxrat Xalmuxamedovni Milliy mudofaa vazirligida rasman kutib oldi. Yakkama-yakka va delegatsiyalar darajasidagi uchrashuvlarda mintaqaviy xavfsizlik va mudofaa sanoati sohasidagi hamkorlik masalalari muhokama qilindi.
Uchrashuvdan soʻng ikki mamlakat oʻrtasidagi harbiy salohiyat va muvofiqlashtirish masalalariga qaratilgan muhim hujjatlar imzolandi.
Rasmiy marosimdan so‘ng Turkiya milliy mudofaa vaziri Yashar Guler O‘zbekiston bilan mudofaa sohasidagi munosabatlar strategik sheriklik darajasiga ko‘tarilayotganini ta’kidladi. General-leytenant Shuxrat Xalmuxamedov hamkasbining ushbu so‘zlarini tasdiqlar ekan, Turkiyaning mudofaa sanoati va harbiy tayyorgarlik tajribasi O‘zbekiston armiyasini modernizatsiya qilish, harbiy salohiyatni har jihatdan yanada mustahkamlashda muhim rol o‘ynashini qayd etdi.
Xususan, 2026-yilgi harbiy hamkorlikni amalga oshirish rejasida mamlakatlar harbiy bo‘linmalarining qo‘shma mashqlari, kadrlar malaka almashinuvi va texnik hamkorlik bosqichlari o‘rin olgan. Harbiy tibbiyot yo‘nalishidagi kelishuvlar amaliyoti esa ikki mamlakat armiyalari oʻrtasida harbiy shifokorlarning malakasini oshirish, harbiy gospital boshqaruvi va harbiy-tibbiy texnologiyalarni o‘rganish, tajriba almashish hamda turli darajadagi treninglarni o‘z ichiga oladi.
Mudofaa vazirligi Axborot va ommaviy kommunikatsiyalar departamenti