O‘zbekiston Respublikasi Mudofaa vazirligi

Joriy yilda ham ushbu imtiyozli tavsiyanomalarni olish uchun O‘zbekiston Respublikasi Qurolli Kuchlari safida muddatli harbiy xizmatni o‘tayotgan askarlar o‘rtasida test sinovlari boshlandi. Mazkur sinovlar askarlarning jangovar, ma’naviy-ma’rifiy hamda umumta’lim fanlari bo‘yicha bilim darajasini xolisona baholash maqsadida tashkil etilgan.

Respublika bo‘ylab Mudofaa vazirligi qo‘shinlarida o‘tkazilayotgan test sinovlari O‘zbekiston Respublikasi Oliy ta’lim, fan va innovatsiyalar vazirligi huzuridagi Bilim va malakalarni baholash agentligi tomonidan amalga oshirilmoqda. Test jarayonlari davomida muddatli harbiy xizmatchilarning jangovar va ma’naviy-ma’rifiy tayyorgarlik darajasi, shuningdek, ularning matematika, fizika fanlari hamda mantiqiy fikrlash ko‘nikmalari sinovdan o‘tkazilmoqda.

Ta’kidlash joizki, matematika, fizika va mantiqiy test savollari tegishli vazirliklar, davlat qo‘mitalari va idoralar bilan hamkorlikda, umumta’lim hamda o‘rta maxsus ta’lim muassasalarining o‘quv dasturlari asosida ishlab chiqilgan.

Test savollarining umumiy soni 100 tani tashkil etib, shundan 40 tasi jangovar tayyorgarlik, 20 tasi ma’naviy-ma’rifiy tayyorgarlik, 10 tasi matematika, 10 tasi fizika fanlari hamda 20 tasi mantiqiy savollardan iborat. Baholash mezonlariga ko‘ra, jangovar tayyorgarlik bo‘yicha har bir to‘g‘ri javob 1,2 ball, ma’naviy-ma’rifiy tayyorgarlik bo‘yicha 1,1 ball, qolgan fanlar bo‘yicha esa 1 balldan baholanadi. Natijada ishtirokchilar maksimal 110 ball to‘plash imkoniyatiga ega bo‘ladi.

Test sinovlari uchun ajratilgan umumiy vaqt 3 soatni tashkil etadi. Mazkur sinovlar 19-yanvar sanasidan boshlanib, 23-yanvar sanasigacha, ya’ni 5 kun davomida o‘tkazilishi belgilangan.

Eslatib o‘tamiz, test sinovlaridan muvaffaqiyatli o‘tgan muddatli harbiy xizmatchilarga beriladigan imtiyozli tavsiyanomalar uch yil muddat davomida amal qiladi.

Mudofaa vazirligi Axborot va ommaviy kommunikatsiyalar departamenti