O‘zbekiston Respublikasi Mudofaa vazirligi

Anjumanda harbiy sohada faoliyat yuritayotgan yetakchi olimlar, professor-o‘qituvchilar, harbiy qism komandirlari, amaliyotchi mutaxassislar hamda kursantlar ishtirok etdi. Tadbir zamonaviy urushlar tajribasi asosida zirhli texnika, xususan, tank bo‘linmalarini uchuvchisiz uchish apparatlari tahdididan himoya qilish masalalarini chuqur tahlil qilishga qaratildi.

Konferensiya davomida zamonaviy mojarolarda dronlardan foydalanish ko‘lamining kengayishi tank bo‘linmalari oldiga yangi chaqiriqlar qo‘yayotgani ta’kidlandi. Shu bois ilmiy ma’ruzalarda mavjud muammolarni aniqlash, ularga qarshi samarali va innovatsion yechimlar ishlab chiqish masalalariga alohida e’tibor qaratildi.

Ma’ruzalarda zirhli texnikalarni dronlardan himoya qilishda elektro-magnit impulslardan foydalanish modellari, zamonaviy va innovatsion himoya materiallarini qo‘llash imkoniyatlari, shuningdek, tanklarning o‘t ochishni boshqarish tizimlarini takomillashtirish bo‘yicha ilg‘or tendensiyalar atroflicha tahlil etildi. Ayrim chiqishlarda zamonaviy jangovar sharoitlarda dronlarga qarshi kurashishda kompleks yondashuvning ahamiyati alohida qayd etildi.

Anjuman ishtirokchilari tank bo‘linmalarini uchuvchisiz uchish apparatlaridan himoyalash bo‘yicha amaliy tajribalar bilan o‘rtoqlashib, mavjud usullarning afzallik va kamchiliklari yuzasidan fikr almashdilar. Muhokamalar davomida harbiy tayyorgarlik tizimiga ilmiy yondashuvlar va zamonaviy texnologiyalarni joriy etish zarurligi ta’kidlandi.

Tadbir yakunida barcha ma’ruzalar yuzasidan xulosalar chiqarilib, umumiy muhokama o‘tkazildi. Mutaxassislar tomonidan bildirilgan taklif va tavsiyalar kelgusida harbiy tayyorgarlik jarayonlarida, shuningdek, ilmiy-tadqiqot ishlarida keng qo‘llanilishi mumkinligi qayd etildi.

Mudofaa vazirligi Axborot va ommaviy kommunikatsiyalar departamenti