O‘zbekiston Respublikasi Mudofaa vazirligi

Tanlovni oʻtkazish jarayonida Maʼnaviyat va maʼrifat kengashlari faoliyatining samarali yoʻlga qoʻyilganligi, Maʼnaviyat va maʼrifat maskanlarining tashkil etilganligi, maʼnaviyat boʻlinmalarining moddiy-texnik bazasi holati, maʼnaviy-maʼrifiy ishlarni tashkil etish va samaradorligini oshirish borasida shakllangan oʻziga xos tajriba, yoshlar siyosati va maʼnaviy-maʼrifiy ishlar uchun masʼul boʻlgan rahbarlar faoliyati tahlili, gazeta va jurnallarga obuna holati, tadbirlarga yoshlar qamrovi kabi masalalarga alohida eʼtibor qaratgan vazirlik-idora va tuman (shahar)larning faoliyatiga ustuvorlik berildi.

Yangilangan nizom talablaridan kelib chiqib bu yil birinchi marta tanlovlarning hududiy bosqichi tashkil etildi, yaʼni barcha tuman (shahar)lar hududiy komissiyalar tomonidan oʻrganildi. Oʻrganishlar natijasiga koʻra, oʻz hududida 1-oʻrinni egallagan 14 ta (har bir hududdan 1 tadan) tuman (shahar) Qoraqalpogʻiston Respublikasi, viloyatlar va Toshkent shahar Maʼnaviyat va maʼrifat kengashlari tomonidan 2025-yilda “Eng namunali tuman va shahar” tanlovida ishtirok etish uchun tavsiya etildi.

Bugun Toshkent shahridagi Milliy gvardiya “Maʼnaviyat va maʼrifat markazi”da baholash natijalariga koʻra, tanlovning gʻolib va sovrindorlarini taqdirlash marosimi oʻtkazildi.

Quvonalrlisi, ushbu tanlovda Mudofaa vazirligi “OAV va ijtimoiy tarmoqlarda eng faol vazirlik-idora” nominatsiyasida gʻoliblikni qoʻlga kiritdi. Eslatib oʻtamiz 2024-yil yakunida sarhisob qilingan ushbu tanlovning natijasida Mudofaa vazirligi “Eng yaxshi vazirlik-idora sayti” nominatsiyasida gʻoliblikni qoʻlga kiritgan edi.

Aytish lozimki, 2025-yil davomida xalq va armiya oʻrtasida sifatli muloqotni yoʻlga qoʻyish, Qurolli Kuchlarimizdagi islohotlar, kiritilayotgan yangilanishlar va erishilayotgan natijalar, jangovar va maʼnaviy-maʼrifiy tayyorgarlik mashgʻulotlari, madaniy-maʼrifiy ishlar, harbiy kadrlar tayyorlash masalalari, “Men gʻolib” shiori ostida armiya oʻyinlari va musobaqalar, harbiy hamkorlik tadbirlari, yoshlarni harbiy-vatanparvarlik tarbiyasi, yurt himoyachilarining sogʻlom turmush tarzi va ijtimoiy himoyasi borasida amalga oshirilayotgan ishlar mamlakatimiz aholisi va keng jamoatchilikka ommaviy axborot vositalari orqali tezkorlik va shaffoflik bilan yetkazib borildi.

Mudofaa yoʻnalishida axborot siyosatini shakllantirish, vazirlik faoliyati haqida ommaviy axborot vositalari, shuningdek Internet tarmogʻi axborot resurslari orqali, shu jumladan matbuot anjumanlari, brifinglar, mediaturlar tashkil etish bilan aholiga muntazam, toʻliq va tezkor ravishda axborot taqdim etib borilmoqda.

Mudofaa vazirligi rasmiy web-sayti va uning ijtimoiy tarmoqdagi sahifalari mudofaa yoʻnalishidagi kontentlar bilan toʻldirilib, materiallar muntazam ravishda yangilanmoqda.

2025-yilning yanvar-dekabr oylarida hukumat portalidagi Mudofaa vazirligi sahifasi (mudofaa.uz)ga mos davrga nisbatan  1 200 dan ortiq material va har bir materialga rasm va videolar ilova qilingan holda eʼlon qilindi.

Xususan, veb-sayt va ijtimoiy tarmoqdagi rasmiy sahifalarni qiziqarli va foydali kontentlar bilan toʻldirish, zarur maʼlumotlar bilan butlash va axborotlarni muvofiqlashtirish, foydalanuvchilarga qator qulayliklar yaratish boʻyicha bir qator yangiliklar joriy etildi.

Jumladan, harbiy xizmatchilarning ijtimoiy himoya masalalariga qaratilgan hamda yoshlarni harbiy vatanparvarlik ruhida tarbiyalash boʻyicha yangi loyihalar yoʻlga qoʻyildi.

Bugungi kunda Mudofaa vazirligi faoliyatini ijtimoiy tarmoqlarda bir vaqtning oʻzida (1 ta materialni 24 soatda koʻrish hisobi) 500 mingga yaqin foydalanuvchi kuzatib boradi. Misol uchun, birgina Instagram sahifasiga joylangan reels-video 35 mingdan 1 mln.gacha koʻriladi, umumiy hisobda 1 oyda 6,4 mln. kuzatuvchi mudofaa sohasidagi axborotlar bilan tanishadi.

Xususan, oʻtgan 11 oy mobaynida Oʻzbekiston MTRKning “Oʻzbekiston-24” teleradiokanalida 49 marotaba “Oʻzbekiston armiyasi” telekoʻrsatuvi, “Yoshlar” teleradiokanalida 48 marotaba “Vatanparvar” telekoʻrsatuvi hamda “Sport TV” teleradiokanalida 24 marotaba “Armiya sporti” telekoʻrsatuvi  efirga uzatildi.

Ortda qolgan 11 oy ichida 120 dan ortiq reportajlar, xabar va lavhalar tayyorlandi hamda davlat va nodavlat telekanalariga yoʻllangan, 60 dan ortiq videroliklar namoyish etildi.

2025-yilda “Vatanparvar” gazetasining 48 ta soni 31 955 nusxada hamda “Oʻzbekiston armiyasi” jurnalining 3 ta soni 18 520 nusxada chop etildi va obunachilarga yetkazildi.

Jumladan, bosma nashrlar orqali Jangovar tayyorgarlik, kasbiy va malakani oshirish, Maʼnaviy-maʼrifiy ishlar, Yoshlarni harbiy-vatanparvarlik tarbiyasi,  Xotira va qadrlash kuni hamda xizmat burchini bajarish vaqtida qahramonlarcha halok boʻlgan harbiy xizmatchilarga bagʻishlangan materiallar,  Harbiy xizmatchilarning huquqiy bilimi va madaniyatini oshirish, korrupsiya, firibgarlik, onlayn oʻyinlarning salbiy illatlarini tushuntirish, Davlat mukofoti bilan taqdirlangan, tanlov va musobaqalarda yutuqlarga erishgan yurt himoyachilari faoliyatini yoritish,  Muddatli harbiy xizmatchilarning xizmat faoliyati, oliy harbiy taʼlim muassasalarining oʻquv jarayonlarini yoritish,  harbiy xizmatchilar va ular oila aʼzolarining ijtimoiy himoyasi,  turli mutaxassisliklar boʻyicha tanlovlar, respublika va xalqaro sport musobaqalari yoʻnalishlari bo‘yicha 700 ga yaqin maqolalar e’lon qilindi.  

Bundan ko‘rinib turibdiki, Mudofaa vazirligida axborot siyosati tizimli va samarali tarzda yuritilmoqda. Vazirlik faoliyatining ochiqligi, jamoatchilik bilan muloqotning uzluksizligi va axborotlarning tezkor yetkazilishi nafaqat vazirlik imijini mustahkamlash, balki aholining mudofaa sohasidagi xabardorligini oshirishga ham katta hissa qo‘shmoqda.

Mudofaa vazirligi Axborot va ommaviy kommunikatsiyalar departamenti