Termizda havo hujumidan mudofaa bo‘linmalarining amaliy mashg‘ulotlari bo‘lib o‘tdi
2025-12-05 11:20:00 / Yangiliklar

Mashg‘ulotlar davomida bo‘linmalarning jipsligi, jangovar tayyorgarligi hamda har qanday vaziyatda yuklatilgan vazifalarni bajarish imkoniyati nazoratdan o‘tkazildi.
Jumladan, o‘quv jarayonlarida bo‘linmalar qo‘mondonlik punktlari, havo hujumidan mudofaa boshqaruv punktlari, shuningdek, asosiy kuchlardan alohida joylashgan zenit bo‘linmalarining o‘t ochish pozitsiyalarini tanlashi, jihozlashi, ularni mudofaa qilish va qo‘riqlashni tashkil etishi kabi masalalar ko‘rib chiqildi.
Musobaqa shaklida o‘tkazilgan mashg‘ulot soha mutaxassislarining nazariy va amaliy bilimlarini ortishida, bu sohaga endi kirib kelgan yosh harbiy xizmatchilarning ko‘nikmasini mustahkamlashda muhim ahamiyat kasb etdi.
Harbiy xizmatchilar nazariy bilimlarini amaliyotga tatbiq etib, topshiriqlarni a’lo darajada bajarishda bor kuch va g‘ayratlarini ishga soldi. Xususan, yuqori qo‘mondonlik tomonidan berilgan topshiriqdan so‘ng zenit hisoblari tomonidan qurilmalar o‘qlanib, jangga tayyor holatga keltirildi. Nishongacha bo‘lgan masofalar, shamol tezligi va o‘q otishga ta’sir etuvchi boshqa omillar qurilma komandiri va nishonga oluvchi tomonidan inobatga olinib, qurilmaga dastlabki kiritmalar o‘rnatildi. Qisqa va uzun navbatlar bilan otilgan turli snaryadlar nishonlarni talafotga uchratib, kutilgan natijani qayd etishdi.
Ta’kidlash kerak, bo‘linmalarning birdamlikdagi harakati, ularni kuchli emotsional va stress holatlarida vazifalarni bajarishga o‘rgatish, kasbiy malaka va mahoratini yuksaltirishga qaratilgan mashg‘ulot davomida jangovar ruh va axloqiy-ruhiy fazilatlarni mustahkamlashga ham alohida e’tibor qaratildi.
III darajali serjant Akbar AHMEDOV,
Termiz garnizoni






