Jasorat, mas’uliyat va kelajak yo‘lidagi muloqot
2025-12-04 17:15:00 / Yangiliklar
Mazkur uchrashuv yoshlar bilan ochiq muloqot olib borish, ularning dolzarb masalalarini o‘rganish hamda har tomonlama qo‘llab-quvvatlashga qaratilgani bilan ahamiyatlidir.
Tadbirda O‘zbekiston Respublikasi Oliy Majlisi Senati a’zolari ishtirok etib, o‘quv-yig‘in qatnashchilari bilan yuzma-yuz suhbatlashdi. Ular yoshlarning o‘qish, xizmat, ijtimoiy faollik, tashabbuskorlik va kasbiy rivojlanish borasidagi savollarini tinglab, mavjud muammolar va takliflarni o‘rganish jarayonida berilgan masalalar bo‘yicha amaliy yechimlarni taqdim etdilar.
Shuningdek, senatorlar mamlakatimizda yoshlarga yaratilayotgan keng imkoniyatlar, davlat tomonidan ko‘rsatilayotgan imtiyozlar, ta’lim va harbiy sohada olib borilayotgan islohotlar haqida batafsil ma’lumot berib, yoshlarni kelajak kasb egasi sifatida faollik, mas’uliyat va fidoyilikka chorladilar.
Uchrashuvda senatorlar bilan bir qatorda harbiy xizmatchilar, talaba va o‘quvchi yoshlar ham faol qatnashib, o‘z fikr-mulohazalarini bildirdilar. Muloqot jarayoni yoshlar uchun nafaqat motivatsiya manbai, balki o‘z istiqbolidagi rejalarini aniq belgilashga yordam beruvchi muhim maydon bo‘ldi.
Tadbir mazkur o‘quv-yig‘inining mazmunini yanada boyitib, yoshlarning siyosiy savodxonligini oshirish, ularni Vatanga sadoqat, fuqarolik burchiga mas’uliyat bilan yondashish ruhida tarbiyalashga xizmat qildi.
Markaziy harbiy okrug matbuot xizmati