“Sazagan” dala-o‘quv maydonida zamonaviy harbiy boshqaruv sinovlari o‘tkazildi
2025-12-02 16:40:00 / Yangiliklar
Tong sahardan o‘quv maydoni harbiy harakatlarga xos jonlanish bilan to‘ldi. Belgilangan rejaga muvofiq, qisqa vaqt ichida barcha harbiy xizmatchilar yuqori jangovar shaylik holatiga keltirildi. Mazkur jarayonda zamonaviy boshqaruv konsepsiyasiga mos ravishda statsionar va mobil qo‘mondonlik punktlari joylashtirildi. Ularning uzluksiz va samarali faoliyat ko‘rsatishi uchun zarur bo‘lgan texnik vositalar, aloqa tizimlari, himoya inshootlari hamda tashkiliy choralar to‘liq ishga tushirildi.
Tanlov davomida qo‘mondonlik punktlarining haqiqiy jangovar sharoitga yaqinlashtirilgan muhitda ishlash tizimi sinchkovlik bilan o‘rganildi. Tezkor axborot almashinuvi, qo‘shinlar harakatini muvofiqlashtirish, bevosita bo‘ysunuvchi bo‘linmalarni boshqarish mexanizmlari amaliy mashg‘ulotlar orqali tekshirib borildi. Har bir bo‘linmaning o‘z vazifasini puxta ado etishi, tezkor qarorlar qabul qilish qobiliyati va mavjud vaziyatga moslashuvchanligi alohida mezon sifatida baholandi.
Mazkur ko‘rik-tanlov zamonaviy harbiy boshqaruv madaniyatini yanada takomillashtirishga, qo‘mondonlik punktlari faoliyatini avtomatlashtirishga va bo‘linmalarni real jangovar sharoitga yanada mos tayyorlashga qaratilgan qimmatli tajribalar yaratdi. Tadbir natijalari okrug miqyosida boshqaruv samaradorligini oshirishga, harbiy xizmatchilarning amaliy ko‘nikmalarini mustahkamlashga sezilarli hissa qo‘shdi.
Ushbu sinovlar kelgusida qo‘mondonlik punkti infratuzilmasini takomillashtirish, raqamli boshqaruv tizimlarini ishlab chiqish hamda qo‘shinlar o‘rtasida yanada ishonchli va tezkor hamkorlikni shakllantirish uchun mustahkam poydevor bo‘lib xizmat qiladi.
Markaziy harbiy okrug matbuot xizmati