O‘zbekiston Respublikasi Mudofaa vazirligi

Dastlab o‘quvchilar qismining desant tayyorgarlik maydonini ko‘zdan kechirdi. Ular mashg‘ulot jarayonlari, desant bo‘linmalarining maxsus tayyorgarlik usullari hamda harbiy xizmatchilar uchun yaratilgan sharoitlar haqida atroflicha ma’lumotga ega bo‘ldi. Mutaxassislar tomonidan o‘quvchilarga qo‘shinlarning jangovar tayyorgarlik tizimi, zamonaviy harbiy texnikalar va ular bilan ishlash jarayonlari bo‘yicha tushuntirishlar berildi.

Tashrif davomida mehmonlar Amir Temur va Jaloliddin Manguberdi nomidagi sinfxonalarda bo‘lib, buyuk sarkardalarning hayoti, harbiy mahorati hamda Vatan mudofaasi tarixidagi o‘rni borasida ma’ruza va taqdimotlarni tingladi. Mazkur tarixiy shaxslar faoliyatiga oid ma’lumotlar yoshlar ongida milliy g‘urur va tarixiy xotira tuyg‘usini yanada mustahkamladi.

Shuningdek, o‘quvchilar harbiy qism muzeyiga ham tashrif buyurib, undagi tarixiy eksponatlar, harbiy meros namunalarini tomosha qildi. Qo‘shinlar shakllanish bosqichlari, jangovar an’analar hamda yurtimiz mudofaa tarixiga oid materiallar o‘quvchilar tomonidan katta qiziqish bilan kuzatildi. Tarix o‘quv binosidagi yurtimiz o‘tmishiga doir ko‘rgazmalar ham yoshlar uchun ahamiyatli ma’naviy manba bo‘ldi.

Tadbir yakunida litsey o‘quvchilariga harbiy qism kutubxonasi faoliyati, undagi adabiy manbalar, ilmiy-nazariy adabiyotlar va yaratilgan zamonaviy o‘quv sharoitlari haqida batafsil ma’lumot berildi. Kutubxonaning yoshlar uchun keng imkoniyatlar yaratishi ularning ilmiy salohiyatini rivojlantirishga xizmat qilishi alohida ta’kidlandi.

Mazkur tashrif o‘quvchilarda harbiy soha, Vatan himoyachilarining sharafli faoliyati, sadoqat va intizom kabi yuksak fazilatlar borasida ijobiy tasavvur uyg‘otdi. Tadbir ishtirokchilari harbiy qismda kechgan mazmunli uchrashuv ularda katta taassurot qoldirganini bildirdi.

Sharqiy harbiy okrug matbuot xizmati