Jizzax viloyati Mirzacho‘l tumani hokimligi

Seminarda tuman hokimi B.K.Mirzakulov, tuman prokurori A.H.Sakiyev hamda tuman IIB boshlig‘i J.R.Shadmonovlar, mutasaddi tashkilotlar rahbarlari, “O‘zagroinspeksiya” tuman bo‘limi, tuman Fermerlar kengashi, fermer xo‘jaliklari rahbarlari hamda mexanizatorlar ishtirok etdi.

Tadbir davomida o‘rim-yig‘im mavsumiga tayyorgarlik, don qabul qilish maskanlarining texnik holati, kombaynlar va transport vositalarining shayligi, hosilni tezkor va sifatli yig‘ib olish bo‘yicha amalga oshirilayotgan chora-tadbirlar muhokama qilindi.

Ta’kidlanganidek, joriy yilda tumanda yetishtirilgan boshoqli don hosilini nest-nobud qilmasdan yig‘ib olish maqsadida maxsus shtab faoliyati yo‘lga qo‘yilgan bo‘lib, o‘rim otryadlariga zamonaviy kombaynlar biriktirilgan. Shuningdek, hosilni tashish uchun yetarli miqdorda transport vositalari jalb etilishi belgilandi.

Seminar davomida g‘alla o‘rim-yig‘imi mavsumida ishtirok etadigan kombaynlarning mavsumga tayyorgarligi, texnik sozligi hamda sifatli ta’mirlanganligi masalalariga alohida e’tibor qaratildi. 

O‘rim-yig‘im jarayonida texnikalardan unumli foydalanish, nosozliklarning oldini olish hamda mavsumni uyushqoqlik bilan o‘tkazish maqsadida barcha kombaynlar bosqichma-bosqich texnik ko‘rikdan o‘tkazilib, zarur ta’mirlash ishlari amalga oshirilgan. Mazkur jarayonlar “O‘zagroinspeksiya” tuman bo‘limi rahbari F.Raxmonov tomonidan doimiy nazoratga olinib, texnikalarning mavsumga to‘liq shay holga keltirildi.   

Joriy yilda Mirzacho‘l tumanida 11 ming 300 gektar maydonda g‘alla parvarish qilinayotgan bo‘lib, hosilni qisqa muddatlarda va sifatli yig‘ib olish maqsadida tumanda jami 45 ta zamonaviy o‘rim kombaynlari mavsumga shay holga keltirildi. Jumladan, 14 ta “Case”, 14 ta “Class Dominator”, 6 ta “Vektor”, 5 ta “New Holland”, 4 ta “Lovol” hamda 2 ta “Sampo” rusumidagi kombaynlar o‘rim-yig‘im ishlariga jalb etilishi belgilangan.

Seminarda kombaynlarning texnik sozligi, yong‘in xavfsizligi, ehtiyot qismlar zaxirasi, mexanizatorlar uchun yaratilgan sharoitlar ham alohida ko‘rib chiqildi. Mas’ullar tomonidan har bir jarayonda intizom va mas’uliyatni kuchaytirish bo‘yicha tegishli ko‘rsatmalar berildi. 

Tadbir yakunida g‘alla o‘rim-yig‘im mavsumini uyushqoqlik bilan o‘tkazish, hosilni qisqa muddatda va yo‘qotishlarsiz yig‘ib olish oziq-ovqat xavfsizligini ta’minlashdagi muhim vazifalardan biri ekani ta’kidlandi.

J.Sa`dullayev

“O‘zagroinspeksiya” tuman bo‘limi bosh mutaxassisi