Jizzax viloyati Mirzacho‘l tumani hokimligi

Loyiha doirasida quyidagi bosqichlar belgilangan:

• 15–24-dekabr kunlari — loyihalarni shakllantirish bosqichi. Ushbu davrda o‘quvchilar o‘z maktablari bilan bog‘liq muammolar va ehtiyojlardan kelib chiqib, taklif va tashabbuslarini loyiha ko‘rinishida tayyorlaydilar.

• 25-dekabrdan 10-yanvar kunlari — loyihalarni saralash bosqichi. Bu jarayonda taqdim etilgan loyihalar belgilangan mezonlar asosida ko‘rib chiqiladi.

• 11–20-yanvar kunlari — ovoz berish bosqichi. Eng dolzarb va ahamiyatli loyihalar ochiq ovoz berish orqali aniqlanadi.

O‘quvchilar o‘z loyihalarini “Ochiq budjet” portali orqali ikki xil usulda ilgari surishlari mumkin. Birinchi usul — portalda mavjud loyiha namunalari orasidan o‘zlariga ma’qul bo‘lganini tanlab, avtomatik tarzda loyiha kiritish. Ikkinchi usul — mustaqil ravishda yangi loyiha ishlab chiqish bo‘lib, bunda o‘quvchilar taqdim etilgan namunalar orasida mavjud bo‘lmagan, ammo maktab hayoti uchun muhim bo‘lgan tashabbuslarni ilgari surish imkoniyatiga ega.

“Mening maktabim” loyihasida 5-sinfdan 11-sinfgacha bo‘lgan barcha o‘quvchilar faol ishtirok etishi mumkin. Ular nafaqat o‘zlari ta’lim olayotgan maktab uchun loyiha kiritish, balki boshqa loyihalar bilan tanishib, ovoz berish orqali tanlov jarayonida bevosita qatnashish huquqiga ega.

Mazkur loyiha o‘quvchilarda fuqarolik faolligi, mas’uliyat va tashabbuskorlikni shakllantirish, shuningdek, ta’lim muassasalarida qulay va zamonaviy muhit yaratishga xizmat qilishi bilan ahamiyatlidir. “Mening maktabim” — bu o‘quvchilar fikri va tashabbuslari asosida maktablarni rivojlantirishga qaratilgan muhim platformadir.