Rossiyalik mutaxassislar ko’p kvartirali uylarga xizmat ko’rsatish yo’nalishida Òzbekiston tajribasini órganmoqda
2024-05-25 15:00:00 / Vazirlik yangiliklar
Ko‘p kvartirali uylarga xizmat ko’rsatish sohasida o’zaro tajriba va fikr almashish tizimning takomillashuvida muhim ahamiyat kasb etadi. Bu borada so’nggi yillarda O’zabekistonda amalga oshirilayotgan keng islohotlar xorijlik mutaxassislarni o‘ziga jalb etmoqda.
Ayni damda Rossiya Federatsiyasi Udmurtiya Respublikasining bir guruh ko‘p kvartirali uylarga xizmat ko‘rsatuvchi boshqaruv organlari vakillari mamlakatimizda bo‘lib turibdi.
Mehmonlar O’zbekistonning uy-joy va kommunal sohasida amalga oshirilayotgan keng islohotlar, sohani takomillashtirishda davlatimiz rahbari tomonidan berilayotgan keng imtiyozlar, boshqaruv organlari rahbarlarining vakolatlari, tadbirkorlik va qo’shimcha servis xizmatlar yaratish imkoniyatlari bilan tanishdilar.
Shuningdek, ular poytaxtimizning Yakkasaroy tumanida faoliyat yurituvchi “Classik building” BSKda bo’lib, aholi uchun yaratilgan qulayliklarni alohida e’tirof etdilar.
Shu bilan birga Qurilish va uy-joy kommunal xo’jaligi vazirligi tomonidan ko’p kvartirali uylarni boshqarish sohasidagi ishlar, xususan, tizimni raqamlashtirish, mulkdorlarning debitor qarzdorliklarini so’ndirishga qaratilgan aniq chora-tadbirlar, qonunchilik hujjatlari xususida to’liq ma’lumot berildi.
Ta’kidlanganidek, bunday ishlar eng muammoli bo’lgan sohani tizimlashtirish, undagi munosabatlarni tartibga solishda muhim ahamiyat kasb etadi.
Rossiyalik boshqaruv organlari vakillari “Classik building” BSK da tashkil etilgan faoliyat bugun zamon talablariga to’liq javob berishi, o’rganilgan tajribani o’z mamlakatlarida qo’llashlarini bildirdilar.
- Mamlakatingiz qisqa vaqt ichida rivojlanish ko’rsatkichlari bo’yicha dunyo miqyosida tan olinmoqda. Jumladan, kommunal sohada ham keyingi yillarda ko’p o’zgarishlar bo’ldi. Albatta, bu xalq manfaatini ko’zlashda, ularga qulay sharoit yaratishda muhim. Turar joylarga xizmat ko’rsatish sohasiga tadbirkorlikni jalb etish tajribasini biz ham o’z faoliyatimizda qo’llaymiz, - dedi Irina Ponomareva.
Ta’kidlash lozimki, mehmonlar Toshkent shahridagi boshqa bir qator boshqaruv tashkilotlari faoliyatini ham o’rganadilar.