O‘zbekiston Respublikasi Madaniy meros agentligi

Ijtimoiy tarmoqlarning birida Xorazm viloyatining Hazorasp tumanida joylashgan Sulaymon qal’asi arxeologiya yodgorligining tevarak-atrofi chiqindilarga to‘lib, qarovsiz qolgani tanqid ostiga olingan. Ushbu ma’lumotlar yuzasidan Madaniy meros agentligi Xorazm viloyati boshqarmasi tomonidan joyiga chiqqan holda o‘rganish ishlari olib borildi. Holat yuzasidan quyidagilarni ma’lum qilamiz.

Xorazm viloyatining Hazorasp tumanida joylashgan “Hazorasp shahri qal’a devori” arxeologiya yodgorligi O‘zbekiston Respublikasi Vazirlar Mahkamasining 2019-yil 4-oktabrdagi “Moddiy madaniy merosning ko‘chmas mulk obyektlari milliy ro‘yxatini tasdiqlash to‘g‘risida”gi 846-sonli qarori bilan madaniy meros obyekti sifatida milliy ro‘yxatga kiritilgan va davlat muhofazasiga olingan.

Ijtimoiy tarmoqlarda tarqalgan holat yuzasidan Agentlikning viloyat boshqarmasi xodimlari tomonidan tuman hokimligi va mahalla fuqarolar yig‘ini vakillari bilan joyiga chiqqan holda mahalliy aholiga tushuntirish ishlari olib borildi. Ushbu yodgorlik nafaqat tuman, balki viloyatdagi ko‘hna yodgorliklardan biri ekanligi inobatga olinib, uni asrab-avaylash barchaning birdek vazifasi ekanligi mahalla faollariga tushuntirildi.

Shuningdek, O‘zbekiston Respublikasining 2001-yil 18-sentabrdagi “Madaniy meros obyektlarini muhofaza qilish va ulardan foydalanish to‘g‘risida”gi qonuni hamda O‘zbekiston Respublikasi 2002-yil 29-iyuldagi “Madaniy meros obyektlarini muhofaza qilish va ulardan foydalanishni yanada takomillashtirish chora-tadbirlari to‘g‘risida”gi qarori qabul qilingan. Mazkur qonun va qarorga ko‘ra, mahalliy davlat hokimiyati idoralari o‘zlariga berilgan vakolatlar doirasida o‘z hududlarida joylashgan madaniy meros obyektlarini aniqlash va hisobga olish, asrab-avaylash, muhofaza qilish vazifalarini yuklatilgan. Shundan kelib chiqqan holda Madaniy meros agentligi Xorazm viloyati boshqarmasi tomonidan arxeologiya yodgorligining tevarak-atrofini obodonlashtirish, obyektda keng ko‘lamli tozalash choralarini ko‘rish yuzasidan Hazorasp tuman hokimligiga joriy yilning 25-mart kuni murojaat xati yuborilgan.