Madaniy meros agentligi xodimi “Mo‘tabar ayol” ko‘krak nishoni bilan taqdirlandi
2025-03-05 15:55:00 / Yangiliklar
Mamlakatimizda 3−10-mart kunlari “8-mart − Xalqaro xotin-qizlar” kuniga bag‘ishlangan “Ayolga hurmat” haftaligi bo‘lib o‘tmoqda. Joriy yilning 4-mart kuni O‘zbekiston Respublikasi Prezidenti huzuridagi Davlat boshqaruvi akademiyasida Oila va xotin-qizlar qo‘mitasi tomonidan davlat hayotida faollik va tashabbuskorlik ko‘rsatib, o‘zining samarali mehnati bilan jamiyat rivojiga munosib hissa qo‘shayotgan 333 nafar ayolni mukofotlash tadbiri bo‘lib o‘tdi.
Mukofotlanganlar orasida Madaniy meros agentligi Badiiy ekspertiza boshqarmasi yetakchi mutaxassisi, “Do‘stlik” ordeni sohibasi Akbarova Gulnara Ilyasovna ham bor.
Gulnara Akbarova uzoq yillik va sermahsul mehnat faoliyati davomida qator mahalliy va xalqaro anjumanlarda madaniy boyliklar migratsiyasi bo‘yicha ma’ruzalar o‘qigan. U 2017-yilda “O‘zbekiston Respublikasi Konstitutsiyasining 25 yilligi” esdalik nishoni, 2019-yilda “Do‘stlik” ordeni bilan taqdirlangan.
Fursatdan foydalanib, Madaniy meros agentligi jamoasi Akbarova Gulnara Ilyasovnani ushbu yuksak mukofot bilan samimiy muborakbod etadi va kelgusi faoliyatida ulkan muvaffaqiyatlar tilab qoladi.
Ma’lumot uchun, “Mo‘tabar ayol” ko‘krak nishoni O‘zbekiston Respublikasi Prezidenti Shavkat Mirziyoyevning tashabbusi hamda Vazirlar Mahkamasining 2018-yil 2-apreldagi 257-son qarori asosida ta’sis etilgan.