O‘zbekiston Respublikasi Madaniyat vazirligi

O‘zbekiston va Gruziya o‘rtasida madaniyat sohasidagi hamkorlikni yanada rivojlantirish maqsadida, O‘zbekiston Respublikasi madaniyat vazirining birinchi o‘rinbosari Bahodir Ahmedov boshchiligidagi delegatsiya Gruziyada bo‘lishdi.

 

Tashrif davomida bir qator madaniyat va san’at muassasalari rahbarlari bilan hamkorlik uchrashuvlari bo‘lib o‘tdi. Jumladan, kuni kecha Bahodir Ahmedov Tbilisi davlat tasviriy san’at akademiyasi rektori bilan uchrashdi.

 

Uchrashuv davomida ikki davlatning madaniyat sohasidagi oliy ta’lim muassasalari o‘rtasida hamkorlikni yo‘lga qo‘yish, ikki mamlakat madaniyatini targ‘ib etuvchi ko‘rgazmalarni tashkil etish, talabalar almashinuvi dasturini o‘rganib chiqish, shuningdek madaniyat sohasidagi ta’lim muassasalarining o‘zaro hamkorligini yo‘lga qo‘yish masalalari muhokama qilindi.

 

Shuningdek, Akademiya rektori tomonidan ta’lim muassasasi tarixi, ta’lim yo‘nalishlari to‘g‘risida ma’lumot berildi hamda O‘zbekiston tomonidan taklif etilayotgan loyihalarni amalga oshirishdan manfaatdor ekanligini ma’lum qildi.

 

So‘ng, Bahodir Ahmedov rahbarligidagi delegatsiyaning Gruziya madaniyat vaziri o‘rinbosarlari Girogi Mirtskulava va Beka Davitulianilar bilan uchrashuvi tashkil etildi.

 

Uchrashuvda, ikki davlat madaniyat vazirliklari o‘rtasida 2026-2028-yilga mo‘ljallangan madaniy hamkorlik dasturini imzolash, kino sohasiga mas’ul bo‘lgan tashkilotlar o‘rtasida o‘zaro hamkorlikni yo‘lga qo‘yish, shuningdek, ikki davlat kinosanoati vakillari o‘rtasida qo‘shma loyihalarni amalga oshirish, teatr va raqs jamoalarining Gruziya va O‘zbekistonga gastrol safarlarini tashkil etish masalalari muhokama qilindi.

 

Shuningdek, suhbat davomida ikki mamlakatlar o‘rtasidagi hamkorlikni rivojlantirish, xususan O‘zbekiston va Gruziya o‘rtasida hamkorlik dasturini imzolash, O‘zbekistonda “Gruziya madaniyati kunlari” tadbirlarini o‘tkazish hamda ikki mamlakatda tashkil etiluvchi xalqaro festivallarda O‘zbekiston va Gruziya madaniyat vakillarining doimiy ishtirokini ta’minlash masalalari muhokama qilindi.

 

Suhbat so‘nggida, Bahodir Ahmedov gruziyalik hamkasblarini joriy yilning aprel oyida Xiva shahrida bo‘lib o‘tishi rejalashtirilayotgan “Xalqaro baxshichilik san’ati festivali”ga taklif qildi.

 

Shu bilan birga, delegatsiya a’zolarining Gruziya davlat filarmoniyasiga tashrifi tashkil etildi hamda tashkilot faoliyati, amalga oshirgan loyihalari bilan yaqindan tanishildi.