Ruminiyaning "Turkiy xalqlar qadimiy o‘yinlari va madaniyati" festivalida o‘zbek kino ijodkorlari tomonidan ishlab chiqilgan tarixiy filmlar namoyish etiladi
2025-02-11 17:00:00 / Yangiliklar
Bugun, 11-fevral kuni madaniyat vazirining birinchi o'rinbosari Avazxon Tadjixanov hamda Rumiyadagi O‘zbekiston kurash federatsiyasi Prezidenti Naim Belgim o'rtasida hamkorlik uchrashuvi bo'lib o'tdi.
Uchrashuv davomida, Naim Belgim ikki tomonlama hamkorlik, shuningdek o‘zbek madaniyati, urf-odatlari va an’analarini Ruminiyada juda hurmat qilinishi va unga qiziqish yuqoriligini alohida ta’kidladi.
Uchrashuvda Ruminiya vakillari joriy yilning sentyabr oyida Ruminiya davlatida bo‘lib o'tishi rejalashtirilayotgan "Turkiy xalqlar qadimiy o‘yinlari va madaniyati" festivaliga O‘zbekiston Madaniyat vazirligi vakillarini taklif etdi. Shu bilan birga festival doirasida O‘zbekistonda ishlab chiqarilgan filmlar namoyishi rejalashtirilayotganligi munosabati bilan o‘zbek ijodkorlari tomonidan ishlab chiqilgan bir necha tarixiy filmlarni taqdim etilishida O‘zbekiston Madaniyat vazirligining ko'magi lozimligini ma'lum qilishdi.
Mazkur murojaat Madaniyat vazirligi tomonidan darhol inobatga olinib mehmonlarga kinoteatrlarda yuqori reytingga erishgan "Islomxo‘ja" va "At-Termiziy" filmlari (ingliz tilidagi tarjimasi bilan) ning yuqori sifatli tasvirlari xotira qurilmasida taqdim etildi.
Vazirning birinchi o'rinbosari Avazxon Tadjixanov Ruminiya vakillariga o‘zbek madaniyatini va milliy sportini xorijda keng targ‘ib qilayotgani uchun o‘z minnatdorchiligini bildirib, mazkur tadbirlarda Madaniyat vazirligi hamkorlik qilishga doimo tayyorligini ta’kidladi.
Suhbat yakunida o‘zaro hamkorlikni rivojlantirish maqsadida qo‘shma loyihalarni amalga oshirishga kelishib olindi.