O‘zbekiston davlat filarmoniyasi Xorazm viloyati bo‘linmasining “Xorazmchasiga” nomli konsert dasturi bo‘lib o‘tdi
2025-01-28 10:00:00 / Yangiliklar
Poytaxtimizdagi “Xalqlar do‘stligi” san’at saroyida O‘zbekiston davlat filarmoniyasi Xorazm viloyati bo‘linmasining “Xorazmchasiga” nomli nihoyatda taassurotli va zavqli konsert dasturi bo‘lib o‘tdi.
Ushbu konsertda O‘zbekiston davlat filarmoniyasi Bosh direktori Anvar Tojiboyev, Bosh direktorning birinchi o‘rinbosari Qobil Yo‘ldashevlar ham ishtirok etishdi.
Xorazm san’atining qadim va an’anaviy yo‘nalishlarini mujassam etgan hamda ularni muhtasham sahnada namoyon etgan mazkur konsert muxlislarga nafaqat zavq ulashdi, balki ularni sho‘x raqslarga ham chorladi.
Baxshichilik, xalfachilik, suvora-yu ufori hamda ushshoq singari qadimiy qo‘shiqchilik yo‘llaridan ajoyib ijrolar deysizmi, “Chanoq o‘yini”, “Qayroq o‘yini”, “Qizlar bahsi”, “Dilxiroj” kabi xalq ko‘nglidan joy olgan raqslarmi, xullas, bunda ko‘plab milliy san’atimiz namunalari ijro etildi.
Ulkan monitorlar, yorqin konsert chiroqlarining bayramona yog‘dusi, Xorazm sahnaviy liboslari va o‘ynoqi ohanglar parda ochilishi bilanoq tomoshabinlarni o‘ziga jalb etgan bo‘lsa, dastur yakunigacha ularga xushnudlik baxsh etdi.
Hulkar Abdullayeva, Xurshida Eshniyozova kabi taniqli xonandalar hamda mahoratli so‘z ustasi Avaz Oxunning chiqishlari muxlislarga yanada yuqori kayfiyat ulashdi.
Shu tariqa O‘zbekiston davlat filarmoniyasi Xorazm viloyati bo‘linmasining poytaxtdagi katta hisobot konserti yuksak e’tiroflar va olqishlar bilan yakunlandi.
Dastur so‘ngida O‘zbekiston davlat filarmoniyasi Bosh direktori Anvar Tojiboyev ijodiy jamoani mazkur muvaffaqiyatli konsert bilan samimiy tabriklab, uning yana bardavom bo‘lishiga tilak bildirdi.