5-yanvar kuni O‘zbek milliy musiqa san’atining atoqli namoyandasi, akademik, O‘zbekiston xalq artisti Yunus Rajabiy tavalludining 128 yilligi munosabati bilan bir guruh maqom san’ati ustalari, Rajabiylar sulolasi vakillari, ilm-fan ziyolilari hamda ko‘plab madaniyat va san’at namoyandalari poytaxtimizdagi Yunus Rajabiy uy-muzeyida yig‘ilishib, Yunus Rajabiyning merosi, ijod yo‘li, asarlarining ahamiyati haqidagi yorqin xotiralar yodga olindi.

 

Ushbu tashrif davomida Rajabiylar sulolasi vakillari bilan samimiy muloqot bo‘lib o‘tdi. Xotira tadbirida Yunus Rajabiyning merosi, ijod yo‘li, asarlarining ahamiyati haqidagi yorqin xotiralar yodga olindi.

 

E’tirof etilganidek, bastakor, xonanda va sozanda, akademik Yunus Rajabiy o‘zbek musiqali drama janrida samarali ijod etib, ko‘plab kuylar, qo‘shiqlar, raqs kuylari, xor asarlari yaratgan edi.

 

Davra suhbati chog‘ida akademiklar, xalq hofizlari va xalq artistlari buyuk musiqashunos Yunus Rajabiyning o‘zbek musiqasi rivojiga qo‘shgan beqiyos hissasini alohida e’tirof etishdi. Xalq qo‘shiqlari va musiqiy merosni to‘plash, asrab-avaylash borasida ulkan mehnat qilgan bu ulug‘ zotning ijodiy yo‘li, qoldirgan bebaho asarlari, milliy san’atimiz rivojidagi o‘chmas izi iliq xotirlandi.

 

Yunus Rajabiy nafaqat o‘zbek mumtoz musiqasi rivojiga, balki yosh avlod musiqiy saviyasining yuksalishiga ham salmoqli hissa qo‘shgan ustoz san’atkor edi. Uning noyob iste’dodi va milliy musiqamizni boyitishga qaratilgan fidoiy mehnati bugungi kunda ham xalqimizning qalbida yashamoqda.

 

Bu xotira – milliy san’atimizga bo‘lgan ehtirom va sadoqat timsoli bo‘lib, kelajak avlodni ajdodlar merosiga hurmat ruhida tarbiyalashga xizmat qiladi.

 

Ma’lumot uchun, buyuk musiqashunos Yunus Rajabiyning 100 yillik yubileyi 1997-yilda keng nishonlangan hamda o‘zbek milliy madaniyati rivojiga ulkan hissa qo‘shgani uchun 2000-yilda “Buyuk xizmatlari uchun” ordeni bilan mukofotlangan.