O‘zbekiston Respublikasi Madaniyat vazirligi

Prezidentning “Ma’muriy islohotlar doirasida madaniyat va turizm sohasida davlat boshqaruvini samarali tashkil qilish chora-tadbirlari to‘g‘risida”gi 2023-yil 27-iyuldagi PF-114-son Farmoni ijrosini ta’minlash, madaniyat va san’at yo‘nalishidagi ta’lim tashkilotlarida uzluksiz metodik xizmat ko‘rsatish, ularning o‘quv-metodik ta’minotini yaxshilash, ta’lim jarayoniga o‘qitishning innovatsion texnologiyalarini joriy etish maqsadida, Vazirlar Mahkamasining tegishli qaroriga asosan, “Madaniyat ta’limi markazi” davlat muassasasi faoliyati yo‘lga qo‘yilmoqda.

 

Unga ko‘ra,

-  madaniyat va san’at sohasidagi umumiy o'rta, maktabdan tashqari, kasbiy, oliy ta’lim tashkilotlari faoliyatini metodik jihatdan muvofiqlashtirish, mazkur ta’lim tashkilotlarida ta’lim sifati hamda samaradorligini oshirish bo‘yicha taklif va tavsiyalar ishlab chiqish;

 
-  respublikaning turli hududlarida istiqomat qilayotgan iste’dodli yoshlarni aniqlash, madaniyat va san’at sohasidagi ta’lim tashkilotlariga maqsadli yo‘naltirish, seleksiya asosida tayyorlash hamda ularning o‘z iqtidorini namoyon etish yo‘nalishlarining ilmiy va uslubiy asoslarini yaratish, amaliyotga tatbiq etish;
 
 
-  madaniyat va san’at ta’limini xorijiy ilg‘or tajriba asosida takomillashtirish, shu jumladan, ta’lim bosqichlarida integratsiyalashgan ta’lim darajalarini berish, bilimni baholash hamda ta’lim sifatini nazorat qilishning zamonaviy uslublarini ishlab chiqish va amaliyotga joriy etish;

 
-  mehnat bozorining soha kadrlariga ehtiyoji va rivojlanish tendensiyalarini tahlil qilish, davlat buyurtmasi asosida kadrlar tayyorlash bo‘yicha qabul parametrlarini shakllantirish, shuningdek, ta’lim oluvchilar va pedagoglarga qo‘yilgan malaka talablarini takomillashtirish to‘g‘risida takliflar tayyorlash;

 
-  madaniyat va san’at sohasidagi ta’lim tashkilotlarining rahbar va pedagog kadrlarini tayyorlash, qayta tayyorlash va ularning malakasini oshirishning ilg‘or shakllarini joriy qilish, pedagoglarning kasbiy mahoratini uzluksiz oshirib borish uchun shart-sharoitlar yaratish;

 

-  idoraviy mansubligi va tashkiliy-xususiy shakllaridan qat’i nazar, davlat ta’lim tashkilotlarida madaniyat va san’at sohasidagi o‘quv-tarbiya jarayonlarining davlat ta’lim standartlariga muvofiqligini o‘rganib borish, tahlil qilish, kadrlar tayyorlash sifati monitoringini yuritish, professor-o‘qituvchilar tarkibini, ularning malakasini oshirish sifatini nazorat qilish hamda xulosalar tayyorlash;

 
-  madaniyat va san’at ta’limi sohasini rivojlantirishga qaratilgan tahliliy va amaliy tadqiqotlar o‘tkazish, ta’lim jarayonida jahon ilm-fani va texnologiyalari yutuqlaridan keng foydalanish bo‘yicha ilmiy ishlanmalar tayyorlanishini tashkil etish;
 
 
-  umumiy o‘rta ta’lim maktablarining “Musiqa madaniyati” fani o‘quv dasturi va darsliklarini takomillashtirish, o‘qituvchilarining malakasini oshirish, milliy va vatanparvarlik tuyg‘ularini shakllantirishga qaratilgan musiqiy to‘plamlar hamda “Barkamol avlod” maktablarida musiqa va san’at yo‘nalishida to‘garaklarni tashkil etish bo‘yicha metodik qo‘llanmalar yaratish yuzasidan taklif va tavsiyalar ishlab chiqish;

 
-  madaniyat va san’at ta’limi tizimini yanada takomillashtirish bo‘yicha normativ-xususiy hujjatlar loyihalarini ishlab chiqish hamda vakolatli davlat boshqaruvi organlari bilan madaniyat va san’at sohasidagi ta’lim tashkilotlarida joriy etish Markazning asosiy vazifalari etib belgilanmoqda.