Unda prokuratura organlari, Bosh prokuratura huzuridagi Iqtisodiy jinoyatlarga qarshi kurashish departamenti va Majburiy ijro byurosi mas’ul xodimlari, Huquqni muhofaza qilish akademiyasining professor-o‘qituvchilari, Faxriylarni ijtimoiy qo‘llab-quvvatlash jamoatchilik markazi hamda Jamoatchilik kengashi raislari, taniqli olimlar, madaniyat xodimlari hamda ommaviy axborot vositalari vakillari ishtirok etdi.

 

Tadbirda Davlat madhiyasi jamoaviy jo‘r bo‘lib kuylandi.

 

Bosh prokuror Nig‘matilla Yo‘ldoshev tadbirni kirish so‘zi bilan ochib, Konstitutsiya qabul qilinganligining 32 yilligi bilan barchani qutladi.

 

Ta’kidlandiki, Bosh qomusimiz inson qadrini ulug‘lashga qaratilgan tarixiy islohotlarning eng ustuvor va mukammal huquqiy asosi bo‘lib xizmat qilmoqda.

 

Ayniqsa, 2023-yilda o‘tkazilgan umumxalq referendumi asosida uning yangi tahrirda qabul qilingani el - yurtning buguni va ertangi taqdiri uchun hal qiluvchi ahamiyat kasb etmoqda.

 

Yangilangan Konstitutsiya muhtaram Prezidentimiz tashabbuslari bilan boshlangan va Yangi O‘zbekistonni barpo etishga qaratilgan keng ko‘lamli o‘zgarishlar ortga qaytmasligining, qonunlar ustuvorligining mustahkam huquqiy kafolati ekanligi, zotan milliy davlatchiligimiz tarixida ilk bor barcha ustuvor qoidalari to‘g‘ridan - to‘g‘ri qo‘llanadigan mukammal Konstitutsiyaga ega bo‘lganligimiz alohida qayd etildi.

 

Tadbir davomida Konstitutsiya bayrami arafasida yana bir xayrli ish amalga oshirilganligi ma’lum qilindi.

 

Xususan, Bosh prokuratura muzeyida qatag‘on qilingan tizim xodimlarining nomini abadiylashtirish ishlarining bir qismi yakuniga yetganligi va ushbu maskanda ularning hayoti va faoliyatini aks ettiruvchi noyob eksponatlar joylashtirilganligi ta’kidlandi.

 

Tadbir davomida Bosh prokurorning buyrug‘iga asosan O‘zbekiston prokuraturasi organlarining shakllanish tarixini tadqiq etishda, tizim faoliyatiga oid tarixiy haqiqatni ro‘yobga chiqarishda hamda o‘zbek huquqshunosligi rivojlanishiga munosib hissa qo‘shgan fidoyi prokurorlar hayoti va faoliyatini o‘rganishda faol qatnashganligi, shuningdek, prokuratura xodimlarining ma’naviy - intellektual salohiyatini yuksaltirishda, yoshlarni vatanparvarlik ruhida tarbiyalashda yaqindan yordam bergan bir guruh hamkorlar taqdirlandi. 

  

Tadbirda taniqli olimlar va madaniyat xodimlari ham so‘z olib, bayram tabrigini izhor qilish bilan birga, prokuratura organlari tizimida amalga oshirilayotgan ma’naviy-ma’rifiy tadbirlar, ayniqsa, qatag‘onga uchragan prokuratura xodimlari nomini abadiylashtirish borasidagi ijobiy ishlarni alohida e’tirof etishdi. 

 

Mazkur tadbir yakunlanganidan so‘ng, O‘zbekiston prokuraturasi muzeyida Qatag‘onga uchragan prokuratura xodimlariga bag‘ishlangan ekspozitsiyaning ochilish marosimi bo‘lib o‘tdi.

 

Ma’lum qilinishicha, O‘zbekiston prokuraturasi tarixi muzeyi innovatsion texnologiyalar asosida kengaytirilib, noyob eksponatlar bilan boyitilgan, jumladan, qatag‘onga uchragan prokuratura xodimlarining hayoti va faoliyatini aks ettiruvchi 20 ga yaqin stend, 30 dan ortiq maxsus mulyajlar hamda sahnalar joylashtirilgan.

 

Mazkur bo‘limda 1930 – 1980-yillarda turli soxta ayblovlar bilan qatag‘on mashinasining qurboni bo‘lgan, tuhmat va bo‘htonlarga uchragan 100 dan ortiq prokuratura xodimining taqdiri arxiv manbalari va dalillar orqali batafsil yoritib berilgan.

 

Shu bilan birga, tadbir davomida 10 mingdan ortiq adabiyotlarni o‘z ichiga olgan muhtasham Bosh prokuratura kutubxonasi ham ochildi. 

 

Umuman, Bosh prokuraturada tashkil qilingan bunday maskanlar, amalga oshirilayotgan tadbirlar nafaqat prokuratura organlari xodimlarining, balki butun xalqimizning, ayniqsa, yosh avlodning ma’naviy qarashlarini yuksaltirishga, ularda milliy qadriyatlar va ajdodlar ma’naviy merosiga cheksiz hurmat va ehtirom shakllanishiga xizmat qiladi.