Assalomu alaykum, hurmatli konferensiya ishtirokchilari!

Qadrli harbiy xizmatchilar!

Muhtaram faxriylar, madaniyat va san’at, adabiyot sohasi vakillari!

Vatanimizning ishonchi va tayanchi bo‘lgan aziz yoshlarimiz!

 

Sizlar bilan bugungi anjumanda uchrashib turganimdan behad mamnun ekanimni bildirmoqchiman.

Fursatdan foydalanib, Mudofaa vazirligining Ma’naviyat va madaniyat departamenti jamoasini yangi bino bilan samimiy tabriklayman.

 

Yaqindagina tashkil etilgan ushbu Departament zimmasiga mudofaa tizimida ma’naviy-ma’rifiy ishlar samaradorligini yanada oshirish, madaniyat va san’at sohasi orqali harbiy xizmatchilarning jangovar ruhini yuksaltirish, qalbida ona yurtga muhabbat va sadoqat tuyg‘ularini mustahkamlash kabi o‘ta mas’uliyatli vazifalar yuklatilgan.

 

Ushbu sharafli ishni amalga oshirishda barchangizga kuch-g‘ayrat, ulkan muvaffaqiyat tilayman.

Yangi bino chinakam ma’naviyat va madaniyat maskani bo‘lib xizmat qilsin.

 

Qadrli tadbir qatnashchilari!

 

Ko‘hna zaminimiz tarixda ne-ne sinovlarga, urush va tahlikali davrlarga guvoh bo‘lganini barchangiz yaxshi bilasiz.

 

Ana shunday murakkab paytlarda ulug‘ ajdodlarimiz ona yurtni himoya qilish yo‘lida o‘z sha’ni, or-nomusini o‘rtaga qo‘yib, yovga qarshi mardonavor kurashgan. Har qarich yer, muqaddas tuproq uchun jon olib, jon bergan.

 

Jaloliddin Manguberdi, Temur Malik, Amir Temur kabi buyuk sarkardalarimizning mardligi, yurt bayrog‘ini qo‘lida mahkam tutib jon taslim qilgan Najmiddin Kubroning jasorati bunga yorqin misoldir.

 

Sohibqiron Amir Temur bobomiz davlatni davlat darajasiga ko‘tarish uchun, avvalo, askarlar va harbiy sohaga katta e’tibor qaratgani tarixiy manbalardan yaxshi ma’lum. Bobomizning harb ilmiga oid qarashlari, hayotiy o‘gitlari hech qachon o‘z ahamiyatini yo‘qotmaydi.

 

So‘nggi yillarda Hurmatli Prezidentimiz, Qurolli Kuchlar Oliy Bosh Qo‘mondoni Shavkat Miromonovich Mirziyoyev boshchiliklarida mamlakatimiz mudofaa qobiliyatini mustahkamlash, sarhadlarimiz daxlsizligi va hududiy yaxlitligini ta’minlash yo‘lida juda katta islohotlar amalga oshirilmoqda.

 

Bu sa’y-harakatlar harbiy xizmatchilar va yoshlarni vatanparvarlik ruhida tarbiyalash, ma’naviy saviyasi va intellektual salohiyatini yuksaltirish kabi ezgu maqsadlarni ham qamrab olgani alohida diqqatga sazovordir.

 

Binobarin, biz yoshlarimizning qandaydir to‘qima yoki o‘ylab topilgan obrazlarga ergashib emas, aynan Jaloliddin Manguberdi, Amir Temur singari buyuk tarix yozgan ajdodlarimizga havas qilib, ulardek haqiqiy vatanparvar bo‘lib kamolga yetishlarini istaymiz. Ta’lim-tarbiya jarayonida ham shunga intilamiz.

 

Ma’lumki, bugun dunyoda turli qarama-qarshiliklar, urush va ziddiyatlar tobora ortib bormoqda. Qolaversa, inson qalbi, yosh avlod ongi uchun kurashlar sezilarli darajada kuchaygan, turli axborot xurujlari avj olgan.

 

Mana shunday murakkab davrda tinchlik va osoyishtalikni ta’minlash o‘z-o‘zidan bo‘ladigan ish emas. Bu – har birimizni doimo sergak va ogoh bo‘lishga, osoyishta hayotimizni qadrlashga, asrab-avaylashga undaydi.

 

O‘z navbatida, harbiy-vatanparvarlik ruhidagi tarbiyaning o‘rni har qachongidan ham dolzarbligini yaqqol ko‘rsatib beradi.

 

Zero, Prezidentimiz ta’kidlaganlaridek, “Bugungi kunda har birimiz amalda Vatan himoyachisi bo‘lishimiz, yoshlarimizni ham shu ruhda kamol toptirishimiz zarur”.

 

Bu borada, albatta, madaniyat va san’at sohasi zimmasidagi mas’uliyat katta. Chunki Qurolli Kuchlar mamlakat chegaralarini himoya qilsa, madaniyat inson qalbi va ongini himoya qiladi.

 

Hozirgi davr nuqtayi nazaridan murakkab bo‘lgan ushbu vazifa e’tiborimiz markazidagi eng muhim masala hisoblanadi.

 

Shu ma’noda, harbiy xizmatchilar va yoshlarda vatanparvarlik ruhini kuchaytirish, jamiyatda milliy armiyamizga nisbatan faxr-iftixor tuyg‘ularini yuksaltirish maqsadida bir qator madaniy-ma’rifiy tadbirlar, loyihalar amalga oshirilmoqda.

 

Fursatdan foydalanib, ulardan ayrimlariga to‘xtalib o‘tsam.

 

Qurolli Kuchlarimizning 32 yilligi hamda Vatan himoyachilari kuni munosabati bilan Madaniyat vazirligi hamda Mudofaa vazirligi tomonidan joriy yil 11 – 20-mart kunlari poytaxtimizdagi “Turkiston” san’at saroyida“Vatan manzumasi” nomli adabiy-ma’rifiy kecha tashkil etildi.

 

Shuningdek, mazkur adabiy-ma’rifiy kecha joriy yilning may-iyun oylarida Qoraqalpog‘iston Respublikasi va viloyatlar markazlarida ham yuqori saviyada o‘tkazildi.

 

Ma’lumot uchun: 13-14-may kunlari Toshkent viloyatida, 16-may kuni Sirdaryo viloyati, 17-may kuni Jizzax viloyati, 20-21-may kunlari Samarqand viloyati, 22-may kuni Navoiy viloyati, 23-24-may kunlari Buxoro viloyati, 4-5-iyun kunlari Andijon viloyati, 6-iyun kuni Farg‘ona viloyati, 7-iyun kuni Namangan viloyati, 10-iyun kuni Qoraqalpog‘iston Respublikasida, 11-iyun kuni Xorazm viloyatida, 13-iyun kuni Qashqadaryo viloyatida, 14-iyun kuni Surxondaryo viloyatida tashkil etildi.

 

Teatrlashtirilgan konsert dasturlarida Qurolli Kuchlar tarkibiga kiruvchi vazirlik va idoralarning ijodiy jamoalari, taniqli san’atkorlarimiz faol ishtirok etdi.

 

2024-yil 2-avgustda Madaniyat vazirligi tegishli vazirlik va idoralar bilan birgalikda “Vatanparvarlik ruhidagi eng yaxshi videorolik”, “Vatanparvarlik ruhidagi eng yaxshi qo‘shiq” hamda “Vatanni madh etuvchi eng yaxshi she’r” tanlovini o‘tkazish yuzasidan qo‘shma qaror qabul qildi.

 

Harbiy xizmatchilar, havaskor hamda professional ijodkorlar o‘rtasida tashkil etilgan ushbu tanlovga respublika bo‘yicha jami 224 ta qo‘shiq, 309 ta videorolik, 1 123 ta she’r kelib tushdi.

 

Yakunda 6 ta qo‘shiq, 6 ta videorolik va 6 ta she’r saralab olindi va g‘oliblar “Yoshlar” ijod saroyida tashkil etilgan tantanali marosimda munosib taqdirlandi.

 

Shuningdek, har yili yanvar va may oylarida Qoraqalpog‘iston Respublikasi, viloyatlar hamda Toshkent shahrida Qurolli Kuchlarimiz tashkil etilganligi va Vatan himoyachilari kuni, Xotira va qadrlash kuniga bag‘ishlangan bayram tadbirlari o‘tkazib kelinmoqda.

 

Bundan tashqari, biz hamkor vazirlik va idoralar bilan birgalikda shu yil dekabr oyining ikkinchi o‘n kunligida “Mardlar qo‘riqlaydi Vatanni!” harbiy-vatanparvarlik qo‘shiqlari ko‘rik-tanlovini o‘tkazishni rejalashtirganmiz.

 

Mazkur tanlov orqali yosh avlodda milliy armiyamizga nisbatan faxr, iftixor tuyg‘ularini yuksaltirishga qaratilgan yangi qo‘shiqlar yaratish hamda harbiy-vatanparvarlik mavzusida ijod qilib kelayotgan ijodkorlarni rag‘batlantirish maqsad qilingan.

 

Shu bila birga, teatr san’ati orqali olis hududlarda istiqomat qiluvchi aholi, shuningdek, harbiy xizmatchilar va ularning oila a’zolari uchun musiqali chiqishlar, teatrlashtirilgan sahna ko‘rinishlari va spektakl namoyishlari muntazam tashkil etib kelinmoqda.

 

Birgina misol, 2024 yilda 20 ta davlat teatri tomonidan 50 ga yaqin spektakl namoyishlari tashkil etildi, ularga 3 000 dan ortiq tomoshabinlar jalb qilindi.

 

Davlat teatrlarida aynan harbiy-vatanparvarlik mavzusida 20 dan ziyod sahna asarlari sahnalashtirilib, doimiy namoyish etilmoqda.

 

Xususan, “Adolat fasli”, “Jaloliddin Manguberdi”, “Ofitserlar”, “Sadoqat”, “Burch”, “Mangu jasorat”, “Bahodir”, “Chegarachi” kabi spektakllar tomoshabinlar tomonidan iliq kutib olinmoqda.

 

Albatta, harbiy-vatanparvarlik ruhini yuksaltirishda filmlarning o‘rni va ta’siri katta. Shu bois so‘nggi yillarda Madaniyat vazirligi huzuridagi Kinematografiya agentligi Mudofaa vazirligi bilan hamkorlikda bir qator kinoloyihalarni amalga oshirdi.

 

Jumladan, davlat buyurtmasi asosida “Tinchlik ortida”, “Hayot”, “Tutqunlik”, “Men terrorchi emasman”, “101-reys”, “Vatan ostonasi”, “Muhabbat bahori”, “Ayol qismati” nomli badiiy filmlar yaratildi.

 

Shuningdek, “Yangi O‘zbekiston kinosolnomasi” turkumida “Yangi O‘zbekiston lochinlari”, “Seni Vatan kutadi”, “Zamonaviy harbiy institut” nomli hujjatli filmlar, ishlab chiqarildi.

 

Bundan tashqari, “Va’da” hamda “Dovyuraklar” nomli seriallar olinmoqda.

 

Davlatimiz Rahbarining 2024-yil 5-iyundagi 209-son qaroriga muvofiq 2024 – 2027-yillarda “Tirik tarix” turkumida bir qator tarixiy, tarixiy-biografik kinoloyihalar yaratilishi rejalashtirilgan. Uning doirasida “Temurbeklar maktabi” nomli badiiy film suratga olinishi ko‘zda tutilgan.

 

Hurmatli anjuman ishtirokchilari!

 

Yuqorida bejiz to‘qima obrazlar haqida so‘z yuritganim yo‘q. Bugun dunyo miqyosida turli kinofilmlar, animatsion filmlar orqali o‘ylab topilgan super qahramonlar targ‘iboti kuchaygan. Bu bilan yoshlar ongiga ta’sir qilish, ularni o‘zga g‘oyalarga ergashtirish maqsadi ko‘zlangani yaxshi ma’lum.

 

Biz ma’rifatli jamiyat sifatida g‘oyaga qarshi g‘oya, jaholatga qarshi ma’rifat bilan kurashish yo‘lidan borganmiz va bundan keyin ham shunday bo‘ladi.

 

Shu ma’noda, milliy g‘oyani targ‘ib qilish, mamlakatimiz aholisi, ayniqsa, yoshlarga vatanparvarlik tuyg‘usini yanada chuqur singdirish bo‘yicha bir qator takliflar ishlab chiqqanmiz. Ulardan biri “Milliy qahramon” obrazlarini yaratishdir.

 

Bu obraz tarixiy shaxslarimiz timsoli asosida yaratiladi. Unda zamonaviylik va milliylik uyg‘unlashtirilgan holda, o‘ziga xos dizayndagi libos hamda personajning tashqi ko‘rinishida jismoniy va g‘ayritabiiy imkoniyatlar aks ettiriladi.

 

Milliy qahramonlar uchun maxsus ssenariylar yozilib, multfilmlar, kinofilmlar, seriallar, adabiyotlar (komikslar) tayyorlanadi va uning doimiy targ‘iboti tashkil etiladi.

 

Bundan tashqari, bolalar uchun milliy qahramonlar obrazi aks etgan yumshoq o‘yinchoqlar, karnaval kostyumlari, suvenirlar va turli esdalik mahsulotlarini ishlab chiqarish yo‘lga qo‘yilishi ham yaxshi natija beradi, degan fikrdamiz.

 

Albatta, bular hozircha taklif. Uning ustida ishlayapmiz va kelgusida amalga oshishiga umid qilamiz. Bu orqali yoshlarimizni buyuk ajdodlarimiz, yengilmas sarkardalarimizga chin dildan havas qiladigan, ular kabi vatanparvar bo‘lishga intiladigan avlodni tarbiyalaymiz. Asosiy g‘oya va maqsadimiz shunda.

 

Umuman aytganda, Vatan himoyachilarining jangovar va milliy ruhini oshirishda madaniyat va san’atning o‘rni muhimligini biz yaxshi tushunamiz va bu yo‘lda bor kuch va imkoniyatlarimizni ishga solamiz.

 

So‘zimning yakunida barchangizga mustahkam sog‘liq, oilaviy baxt, oliyjanob va mas’uliyatli faoliyatingizda ulkan zafarlar tilayman.

 

E’tiboringiz uchun katta rahmat.