Ayni kunlarda Paragvay poytaxtida YUNESKOning Nomoddiy madaniy merosni muhofaza qilish bo‘yicha hukumatlararo qo‘mitasining 19-sessiyasi bo‘lib o‘tmoqda.

 

4-dekabr kuni qoʻmita yigʻilishida Oʻzbekiston tomonidan Markaziy Osiyoning boshqa davlatlari bilan birgalikda ilgari surilgan "Rubob cholg‘usi sozgarligi va ijrochiligi san’ati" nominatsiyasi bir ovozdan Insoniyatning nomoddiy madaniy merosi Reprezentativ roʻyxatiga kiritildi.

 

Qo‘mita rubobning Markaziy, Janubiy va Janubi-G‘arbiy Osiyodagi eng qadimiy cholg‘u asboblaridan biri sifatida tarixiy ahamiyatini alohida ta’kidladi. Ushbu vosita mintaqa xalqlarining madaniy va ijtimoiy hamjihatligini mustahkamlash, madaniy almashinuv va hamjihatlikni mustahkamlashda muhim ahamiyat kasb etadi.

 

Qayd etilishicha, rubob chalish san’ati ham sifatli ta’lim olish, gender tengligini ta’minlash, inklyuziv iqtisodiy taraqqiyot va barqarorlikni ta’minlashga xizmat qiladi. Bu san’atni asrab-avaylash, targ‘ib etish va yanada rivojlantirishga qaratilgan amaliy chora-tadbirlar ham milliy, ham xalqaro miqyosda yuksak baholandi.

 

"Rubob cholg‘usi sozgarligi va ijrochiligi san’ati" Oʻzbekiston tashabbusi bilan YUNESKO roʻyxatiga kiritilgan nomoddiy madaniy merosning 16-elementi boʻldi.

 

O‘zbekiston tomonidan qo‘shni mamlakatlar bilan birgalikda "Rubob cholg‘usi sozgarligi va ijrochiligi san’ati" nomzodnomasi Insoniyat nomoddiy madaniy merosi reprezentativ ro‘yxatiga kiritildi.

 

O‘z navbatida YUNESKOning Insoniyat nomoddiy madaniy merosi Reprezentativ ro‘yxatiga 2008-2024-yillar davomida o‘zbek milliy nomoddiy madaniy merosining 16 ta elementi kiritildi.

 

YUNESKOning Nomoddiy madaniy merosni muhofaza qilish bo‘yicha hukumatlararo qo‘mitasining 19-sessiyasi 7-dekabrga qadar davom etadi.

 

 

Ma’lumot uchun: YUNESKOning Insoniyat nomoddiy madaniy merosi Reprezentativ ro‘yxatiga quyidagilar kiritilgan: 

Shashmaqom, Boysun madaniy muhiti, Navro‘z, Katta ashula, Askiya san’ati, Palov madaniyati va an’analari, “Xorazm raqsi – Lazgi”, “Miniatyura san’ati”, “Baxshi san’ati”, An’anaviy ipakchilik, Nasriddin afandi latifalarini aytish an’anasi, O‘zbekiston kulolchilik maktablari, Iftor va u bilan bg‘liq ijtimoiy-madaniy an’analar, Naqqoshlik – kitob bezak san’ati, “Marg‘ilon hunarmandchilik maktabi: atlas va adras to‘qish texnologiyasi”, "Rubob cholg‘usi sozgarligi va ijrochiligi san’ati".