Yunus Rajabiy nomidagi O‘zbek milliy musiqa san’ati institutida O‘zbekiston Respublikasi Vazirlar Mahkamasining “Maqom san’atiga ixtisoslashtirilgan maktab-internatlarni tashkil etish to‘g‘risida” 2019-yil 21-noyabrdagi 940-son qarorida belgilangan topshiriqlar ijrosini ta’minlash, o‘quv jarayoniga yangi axborot-pedagogik texnologiyalarni tatbiq etish, yangi avlod o‘quv adabiyotlarni yaratish,mutaxassislik bo‘yicha fan dasturlarini soha mutaxassislari ishtirokida qayta ko‘rib chiqish maqsadida o‘quv seminar o‘tkazildi.

 

Mazkur seminarda madaniyat vaziri Ozodbek Nazarbekov boshchiligida vazirlik tasarrufidagi Maqom san’atiga ixtisoslashgan maktab-internatlari hamda baxshichilik maktabining direktorlari va mutaxassislik fanlar bo‘yicha bo‘lim boshliqlari, O‘zMMSI professor-o‘qituvchilari hamda iqtidorli o‘quvchilar ishtirok etdi.

 

Maqom maktab o‘quvchilari hamda O‘zMMSI professor o‘qituvchilari bilan mavzu yuzasidan turli master klass va davra suhbatlari o‘tkazildi.

 

Shuningdek, Ozodbek Nazarbekov yig‘ilish davomida O‘zbekiston xalq artisti, O‘zbekiston qahramoni, O‘zbekiston Respublikasi Oliy Majlisi Senat a’zosi bo‘lgan Munojat Yo‘lchiyevani qutladi.

 

Ma’lumot uchun, Maqom san’ati o‘zbek xalqining bebaho madaniy merosi hisoblanadi. Yangi maktab-internatlar quyidagi maqsadlar asosida tashkil etildi:

 

Maqom san’atini o‘rganish va rivojlantirish: Yosh avlodni milliy san’atga jalb qilish orqali maqom san’atining boy madaniy merosini saqlab qolish va rivojlantirish.

 

Tajribali ustozlar bilan ta’lim: Maqom san’ati ustalari tomonidan yetakchilik qilinadigan sifatli ta’lim tizimini yaratish.

 

Zamonaviy sharoitlar: O‘quvchilarning ilmiy va ijodiy rivojlanishi uchun barcha zarur shart-sharoitlar bilan ta’minlashdan iborat.